Բերման ենթարկվածների թիվը հասել է 49-ի. «Մարտական եղբայրություն»

«Մարտական եղբայրություն» միաբանությունը հայտնել է, որ բերման ենթարկվածների թիվը հասել է 49-ի:

«Շուտով ոստիկանությունը կհոգնի Մարտական Եղբայրության անդամներին բերման ենթարկելուց։
Կհայտնվեն նորանոր խմբեր, ամեն բերման ենթարկվածի տեղը կլրացնեն երեքը։ Մեր պայքարը ի վերջո կպսակվի հաջողությամբ։ Դուք մեզ հարվածելու եք,մենք ավելի ուժեղ ենք դառնալու», - ասված է գրառման մեջ։

Ավելի վաղ հաղորդվել էր, որ բերման են ենթարկվել «Մարտական եղբայրություն» միաբանության անդամներ Արման Պետրոսյանը, Տարոն Սիմոնյանը և Գարիկ Սարգսյանը, որոնք գտնվում էին Ոսկեպարում։

«Չնայած աննախադեպ ռեպրեսիաներին Մարտական Եղբայրության անդամների մի խումբ հասել է Ոսկեպար։ Տեղում ոստիկանները բերման են ենթարկել նաև միաբանության անդամ Հովսեփ Ղազարյանին», - նշված է մեկ այլ գրառման մեջ։

Ավելի վաղ ՆԳՆ-ից հայտնել էին, որ ապօրինի զենք-զինամթերք կրելու և պահելու կասկածանքով 24 անձ ձերբակալվել և տեղափոխվել է ոստիկանության տարածքային ստորաբաժանումներ:

Հիշեցնենք, որ «Մարտական եղբայրություն» միաբանությունը ֆեյսբուքյան էջում ահազանգել է, որ կորել է կապը քաղաքագետ Հրանտ Տեր-Աբրահամյանի հետ՝ ենթադրելով, որ վեջինիս, ամենայն հավանականությամբ, բերման են ենթարկել։

«Մարտական եղբայրություն»-ը մեկ այլ գրառմամբ հայտնել էր, որ վաղ առավոտյան ձերբակալվել է միաբանության անդամ Ավետիս Ավետիսյանը։

Մեկ այլ գրառմամբ հաղորդվել էր այլ ձերբակալվածների մասին, սակայն անուններ չեն հրապարակվել: Հայտնի է, որ որպես ձերբակալման հիմնավորում բերվել է ապօրինի զենք զինամթերք կրելու կասկածանքը։

Հաղորդվում է, որ Մարդու իրավունքների պաշտպանի հանձնարարությամբ արագ արձագանքման խումբն այս պահին գտնվում է ՀՀ ՆԳՆ ոստիկանության բաժնում: