Գերմանիայում հետաքննում են բունդեսվերի սպաներին գաղտնալսելու հանգամանքները

Գերմանիայի դաշնային հանրապետության գլխավոր դատախազությունը գործ է հարուցել բունդեսվերի բարձրաստիճան սպաների զրույցի գաղտնալսման հանգամանքները պարզելու համար: Այդ մասին հայտնում է ТАСС-ը՝ հիմնվելով գերմանական WDR հեռուստաալիքի տեղեկատվությանը:

«Գաղտնի հետախուզական գործունեություն» ծավալելու կասկածանքով՝ անհայտ անձանց նկատմամբ հետաքննությունը վարում է անձամբ գլխավոր դատախազը։ Բուն հետաքննությունը վստահվել է Գերմանիայի քրեական ոստիկանության դաշնային գերատեսչությանը: Քննիչները պետք է պարզեն, թե անհայտ անձանց հատկապես ինչպես է հաջողվել գաղտնալսել զինվորականների խոսակցությունը և կոնկրետ ով է պատասխանատու դրա համար։ Քննիչները ենթադրում են, որ գաղտնալսմանն առնչվում է ռուսական հատուկ ծառայությունը։

Մարտի սկզբին Գերմանիայի պաշտպանության նախարար Բորիս Պիստորիուսը հայտարարել էր, որ գլխավոր դատախազությունը գործի կանցնի ռազմական հակահետախուզության ծառայության հետաքննությունից հետո։

Հիշեցնենք, որ ամսվա սկզբին «Russia today» գործակալությունը հրապարակել էր Ղրիմի կամրջի ռմբակոծման հնարավորությունը քննարկող գերմանացի սպաների զրույցի սղագրությունը: Փետրվարի 19-ին ծավալված այդ քննարկմանը մասնակցել են Բունդեսվերի ռազմաօդային ուժերի հրամանատարության՝ գործողությունների և վարժանքների բաժնի պետ Ֆրանկ Գրեֆեն, ռազմաօդային ուժերի տեսուչ Ինգո Գերհարտցը և Բունդեսվերի տիեզերական հրամանատարության օդային գործողությունների կենտրոնի աշխատակիցներ Ֆենսկեն և Ֆրոշտեդտը։ Նրանք առաջարկել էին գործողությունը բաժանել փուլերի և ծրագրման հարցում դիմել Մեծ Բրիտանիայի աջակցությանը։ Սպաներից մեկը հայտարարել էր, որ հարձակման համար կարող են օգտագործվել Taurus հրթիռներ և ֆրանսիական Rafale կործանիչ։

Քննարկման կապակցությամբ Ռուսաստանի ԱԳՆ-ն դեմարշ էր հայտարարել Գերմանիայի դեսպան Ալեքսանդր Լամբսդորֆին և պարզաբանումներ պահանջել։