Ի՞նչ է Ջուսի իսկական անունը, ինչո՞ւ երգչուհին չի միանում քաղաքացիական ակցիաներին. երգչուհու պարզաբանումները

Օրեր առաջ Դար 21 հեռուստաընկերության մրցանակաբաշխության ժամանակ երգչուհի Ջուսն արժանացավ լավագույն արտիստ մրցանակին:

Ի՞նչ է Ջուսի իսկական անունը, ինչո՞ւ հենց Ջուս, ո՞վ է նրա առաջին քննադատը, և ինչո՞ւ Ջուսը չի միանում քաղաքացիական բողոքի ակցիաներին: Այս և այլ հարցերի մասին Operativ.am-ի թղթակիցը զրուցեց երգչուհու հետ:

Խոսելով իր իրական անվան մասին՝ երգչուհին պատմեց. «Անունս եկել է Մոսկվայից: Ես առաջ Յանինա էի: Քանի որ մայրս ռուս է, լեհ է, ու ընտրել է այդպիսի անուն: Երբ գնացի Մոսկվա և ապրում էի այնտեղ 9 տարի, ես ռուսների համար էկզոտիկ էի, որպես ածական ասում էին Ջուս: Այդպես Ջուսը մնաց: Հետո, երբ ծանոթացա իմ առաջվա պրոդյուսերի՝ հոլանդանցի Էնթոնի Հայսկամպի հետ, մենք միասին նկարահանեցինք իմ առաջին տեսահոլովակը, և քանի որ Եվրոպայի շոու բիզնեսի համար Ջուսն ավելի լավ անուն էր, քան Յանինան, և որպեսզի ինձ դատի չտային (քանի որ Նիդերլանդներում կա ռադիո Ջուս և Ճապոնիայում խումբ կա այդպիսի անունով և դա իրենց «ապրանքանշանն է»), ես չեմ կարող վերցել»,- ասաց Ջուսը:

Հենց խնդիրներից խուսափելու համար է ինքը վճռել և 2005 թվականին անձնագրով փոխել իր անունը:

Խոսելով իր կերպարի վերաբերյալ ընտանիքի վերաբերմունքից՝ Ջուսը նշեց, որ իր մայրը շատ ազատ է թողել, երբեք չի ասել սա մի հագիր, նա մի հագիր. «Ես միշտ սիրել եմ տարբերվել շրջապատի մարդկանցից, ես դա միտումնավոր չեմ անում, սիրում եմ հագնել կամ երգել այն, ինչ ոչ ոք չի երգել մեզ մոտ: Դա իմ էությունն է»:

Հարցին, թե ով է Ջուսի առաջին քննադատը, այսինքն՝ ում խոսքն է, որ, այպես ասենք, «անցնում է» Ջուսի մոտ, երգչուհին պատասխանեց. «Ես, ես ինքս եմ ինձ քննադատում՝ երգեր ընտրելիս, կարիերայում, պահելաձևում. կամ ասում եմ շատ լավ է, կամ ասում եմ շատ վատ է»:

Ջուսից հետաքրքվեցինք նաև, թե իրեն երբևէ չենք տեսնում քաղաքացիական ակցիաներին մասնակցելիս, ո՞րն է պատճառը: Այս առնչությամբ երգչուհին ասաց. «Եթե հայտնի մարդիկ հավաքվում և աջակցում են մարդկանց, պետք է ոչ թե կանգնեն մարդկանց հետ (որովհետև դա գովազդային բնույթ է կրում), այլ նրանք պետք է հավաքվեն և գնան քաղաքապետարան: Ինձ ասել են գնա 150 դրամ պահի (նկատի ունի տրանսպորտի թանկացման դեմ ակցիան - խմբ.) մարդկանց մոտ: Ես ասել եմ չէ, դա համ գովազդային է, համ էլ պետք չի, մարդկանց ասել տեսեք՝ ես ինչ լավն եմ»: Ջուսն ասաց, որ եթե իրեն հրավիրեն քաղաքապետարան, ապա կգնա, իսկ մինչ այդ պայքարել է Ֆեյսբուքում, որտեղ 5000 ընկեր ունի, դա էլ բավական չէ, կայքերրը տարածում են իր գրառումները:

Ինչ վերաբերում է պարտադիր կուտակային կենսաթոշակների համակարգի մասին երգչուհու տեսակետին, ապա նա նախ հարցրեց, թե ինչ է իրենից ներկայացնում օրենքը, ապա ասաց. «Դա շատ վատ է, կատեգորիկ դեմ եմ, որովհետև մարդիկ ավելի ճիշտ ստանում են աղքատավարձ, ամեն ինչ թանկանում է, այդպես չի կարելի: Մենակ մեր երկրում է երևի այդպես»: Ավելի հստակ պատկերացնելով օրենքը՝ Ջուսն ասաց, որ մարդկանց ընտրության հնարավորություն է պետք տալ. «Պետք է ընտրություն տալ մարդկանց, կարող է՝ մարդուն հարմար չի»,-եզրափակեց երգչուհին:

Զրուցեց Աստղիկ Հովհաննիսյանը