Հնդկաստանը և Ճապոնիան համատեղ զորավարժություններ են սկսել

Հնդկաստանի և Ճապոնիայի ցամաքային զորքերի ստորաբաժանումներն սկսել են հինգերորդ Dharma Guardian ամենամյա մարտավարական զորավարժությունները Ռաջաստանի արևմտյան նահանգի Մահաջան զորավարժարանում, հայտնում են ՏԱՍՍ գործակալությունից:

Զորավարժությունները կտևեն մինչև մարտի 9։ Դրանց նպատակը երկու երկրների զինծառայողների մարտական ​​համագործակցության ամրապնդումն է և համատեղ գործողությունների կատարման ժամանակ փոխգործակցության բարձրացումը։

Զորավարժություններին մասնակցում են Ճապոնիայի զինված ուժերի 34-րդ հետևակային գնդի և Հնդկաստանի «Ռաջպուտանա ռայֆլս» բանակային գումարտակի զինծառայողները։

Հնդկաստանը և Ճապոնիան ամեն տարի անցկացնում են ցամաքային զորքերի Dharma Guardian համատեղ զորավարժությունները, ինչպես նաև ռազմածովային ուժերի և ռազմաօդային ուժերի զորավարժություններ:

2015 թվականից Ճապոնիան դարձել է նաև Malabar ռազմածովային զորավարժությունների մշտական ​​մասնակիցը, որոնք անցկացնում են Ավստրալիան, Հնդկաստանը և ԱՄՆ-ն: