Գերմանիայում Lufthansa-ի գործադուլի պատճառով չեղարկվում են հարյուրավոր չվերթեր

Գերմանական Lufthansa ավիաընկերության աշխատողների հերթական նախազգուշական գործադուլը, որը սկսվել է փետրվարի 20-ին, կհանգեցնի հարյուրավոր չվերթերի չեղարկման և կարող է ազդել մինչև 100 հազար ուղևորի վրա: «Արմենպրես»-ի փոխանցմամբ՝ այս մասին հաղորդում է Deutsche Welle-ի ռուսական ծառայությունը։

Արդեն փետրվարի 19-ին ավիափոխադրողն ստիպված է եղել Մայնի Ֆրանկֆուրտում գտնվող իր հիմնական հանգույցում չեղարկել ավելի քան 50 չվերթ: Իրականացվել են միայն մի քանի միջմայրցամաքային թռիչքներ։

Գործադուլի պատճառով ավիաընկերությունը փետրվարի 20-ին կկարողանա իրականացնել իր պլանավորած մոտավորապես 1000 չվերթի 10-20 տոկոսը: Հանրային սպասարկման ոլորտի աշխատողների միացյալ արհմիությունը` Ver.di-ն, Մայնի Ֆրանկֆուրտի, Մյունխենի, Համբուրգի, Բեռլինի, Դյուսելդորֆի, Քյոլն-Բոննի և Շտուտգարտի օդանավակայանների ցամաքային անձնակազմին կոչ է արել միանալ բողոքի ակցիային։

Պաշտոնապես գործադուլը կտևի մինչև չորեքշաբթի օրը՝ փետրվարի 21-ը։