Եվրոպայի չեմպիոն դառնալը միշտ դժվար է, տարեցտարի զգում եմ՝ բոլորը հիմնականում իմ դեմ են պատրաստվում. Արթուր Ալեքսանյան

«Եվրոպայի չեմպիոն դառնալը միշտ դժվար է, տարեց տարի զգում եմ, որ բոլորը հիմնականում իմ դեմ են պատրաստվում»:

Այս մասին «Զվարթնոց» օդանավակայանում լրագրողների հետ զրույցում ասաց Օլիմպիական խաղերի ոսկե, արծաթե, բրոնզե մեդալակիր, աշխարհի քառակի, Եվրոպայի 7-ակի չեմպիոն Արթուր Ալեքսանյանը:

«Ուրախ եմ, որ 7-րդ անգամ հաղթեցի: Ամեն չեմպիոնություն տարբերվում է, այս 7-րդն էլ է տարբեր ինձ համար: Յուրաքանչյուր հաղթանակի համար տանջվել ենք, մարզվել ենք, աշխատել ենք: Ամեն մի ոսկի իր գինն ունի»,- ասաց Ալեքսանյանը:

Նրա խոսքով՝ եզրափակիչ գոտեմարտը հետաքրքիր է ստացվել, սակայն առաջին վայրկյաններին մրցակցի հնարքը անակնկալ չի եղել իր համար:

«Գիտեի, որ առաջին րոպեներից հարձակվելու է, պարզապես այդ հնարքին չէի սպասում: Ճիշտ է, տվեցի հնարքը, բայց հետո կարողացա հետ բերել ամեն ինչ: Եվրոպայի չեմպիոն դառնալը միշտ դժվար է: Տարեց տարի զգում եմ, որ բոլորը հիմնականում իմ դեմ են պատրաստվում: Այս առումով ամեն անգամ ավելի է դժվարանում, բայց, փառք Աստծո, ինձ մոտ ստացվում է հաղթել: Առջևում Օլիմպիական խաղերն են, որից հետո պարզ կլինի»,- նշեց Ալեքսանյանը:

Հիշեցնենք՝ Օլիմպիական չեմպիոնը 97 կգ քաշայինների եզրափակիչում մրցեց ռուսաստանցի Մագոմեդ Մուրտազալիեւի հետ եւ 6:3 հաշվով փառահեղ հաղթանակ տարավ:

Ալեքսանյանը եզրափակիչ էր դուրս եկել՝ կիսաեզրափակչում 5:1 հաշվով առավելության հասնելով բելառուս Աբուբակար Խասլախանավի նկատմամբ։ Ալեքսանյանը պայքարը սկսել էր 1/8 եզրափակչից, որտեղ 9:1 հաշվով ժամանակից շուտ հաղթել էր թուրք Բեյտուլա Կաիսդագինին, իսկ քառորդ եզրափակչում ըմբիշը 8:3 հաշվով առավելության էր հասել Նիդերլանդների ներկայացուցիչ Թայրոն Շտենկերբուրգի նկատմամբ, փոխանցում է armtimes.com-ը։