Շմոլ գազով թունավորում․ ինչպես օգնել

Շմոլ գազից թունավորումն առաջանում է, երբ արյան մեջ կուտակվում է ածխածնի օքսիդ:

Երբ օդում պարունակվում է չափազանց շատ ածխածնի մոնօքսիդ (CO), արյան կարմիր բջիջներում (էրիթրոցիտներ) թթվածինը փոխարինվում է ածխածնի մոնօքսիդով: Սա կարող է հանգեցնել հյուսվածքների լուրջ վնասման կամ նույնիսկ մահվան:

Ածխածնի մոնօքսիդը գազ է, որը չունի հոտ, համ և գույն և չի գրգռում շնչուղիները: Այն առաջանում է վառելիքի այրման, հատկապես՝ թերայրման արդյունքում, ներառյալ գազը, փայտը, պրոպանը կամ փայտածուխը: Սարքավորումները, մեքենաների շարժիչները, գազօջախները կամ այլ կենցաղային սարքերը, որոնք օգտագործում են ածխածնի հիմքով վառելիքներ և լավ չեն օդափոխվում, կարող են հանգեցնել գազի կուտակման վտանգավոր մակարդակի: Կիպ փակ տարածքը ավելի է վատթարացնում նման կուտակումը:

Յուրաքանչյուր ոք, ով ենթարկվում է ածխածնի մոնօքսիդի ազդեցությանը, պետք է անմիջապես դուրս գա մաքուր օդի և դիմի բուժօգնության: Անմիջապես պետք է դիմել նաև մոտակա անհետաձգելի բուժօգնության ծառայություն, եթե ածխածնի մոնօքսիդի ազդեցության ենթարկված անձը կոմայի մեջ է կամ չի կարող արձագանքել ձեր հարցերին ու ազդակներին:

Շմոլ գազով կամ ածխածնի մոնօքսիդով թունավորումն առավելապես ազդում է գլխուղեղի և սրտի վրա։

Ժամանակի ընթացքում շմոլ գազի ազդեցությունը կարող է հանգեցնել ախտանիշների, որոնք կարող են շփոթվել առանց ջերմության ընթացող գրիպի հետ:

Ածխածնի մոնօքսիդի թունավորման ավելի հստակ ախտանիշները կարող են ներառել՝

գլխացավ՝ բութ, շարունակական, առավել կենտրոնացված ճակատային շրջանում,

թուլություն,

գլխապտույտ,

սրտխառնոց կամ փսխում,

շնչարգելություն և հևոց,

շփոթվածություն և իրականության աղճատված ընկալում,

մշուշոտ տեսողություն,

քնկոտություն,

մկանային վերահսկման կորուստ,

գիտակցության կորուստ:

Նյարդային համակարգի և գլխուղեղի հետ կապված ախտանիշները կարող են ի հայտ գալ նաև ածխածնի մոնօքսիդի թունավորումից վերականգնվելուց հետո: Նման վիճակի ռիսկն ավելի բարձր է այն մարդկանց մոտ, ովքեր կորցրել են գիտակցությունը և տարեց մարդկանց մոտ:

Ախտանիշները կարող են ներառել՝

հիշողության կորուստ,

անձնային փոփոխություններ,

շարժողական խնդիրներ:

Ածխածնի մոնօքսիդով թունավորումը կարող է հատկապես վտանգավոր լինել այն մարդկանց համար, ովքեր քնած են, հարբած կամ թմրամիջոցների ազդեցության տակ: Շմոլ գազը կարող է գլխուղեղի ծանր վնասման կամ մահվան պատճառ դառնալ՝ նախքան որևէ մեկը կհասկանա, որ խնդիր կա, փոխանցում է Aysor.am-ը։