Ինչպես նախկինում, հիմա էլ պատրաստ եմ կանգնել ժողովրդիս կողքին, սակայն այդ ընդվզումը, պայքարը ժողովրդի մոտ չեմ տեսնում. Անի Քոչարը՝ տրանսպորտի թանկացման մասին

Ինչպես արդեն հայտնի է, Երևանի քաղաքապետարանը թանկացնում է հասարակական տրանսպորտը: Այդ մասին երեկ հայտարարեց նաև փոխքաղաքապետ Սուրեն Գրիգորյանը:

Հիշեցնենք, որ 2013 թվականին, երբ քաղաքապետարանը որոշում էր կայացրել հասարակական տրանսպորտի գինը թանկացնել և սահմանել 150 դրամ, շատ հասարակական գործիչներ, ինչպես նաև շոուբիզնեսի ներկայացուցիչներ ակցիաներ արեցին և պայքարեցին դրա դեմ: Արդյունքում տրանսպորտի գինը չթանկացավ:

Լրագրող Անի Քոչարը, ով 2013 թվականին մասնակցում էր տրանսպորտի թանկացման դեմ ակցիաներին, Aysor.am-ի հետ զրույցում նշեց.

«Պետք է ասեմ, որ շատ է շահարկվում մեր նախորդ պայքարը տրանսպորտի թանկացման դեմ, որն իմ պարագայում, գոնե, արդարացված չէ, քանի որ ի տարբերություն շատերի, ես երբեք որևէ պայքար չեմ օգտագործել հանուն անձնական և սեփական, քաղաքական հետագա շահերի, այլ մշտապես կանգնել եմ իմ ժողովրդի կողքին: Այնտեղ, որտեղ զգացել եմ, որ իմ ժողովուրդն աջակցության կարիք ունի, նրանց ձայնն էլ ավելի լսելի դարձնելու անհրաժեշտություն կա, ես նրանց կողքին եմ եղել, անկախ նրանից դա ինձ վերաբերվե՞լ է, խանգարե՞լ է կամ ինձ ցա՞վ է պատճառել, թե՞ ոչ: Ես նախկինում էլ ունեի անձնական փոխադրամիջոց, այժմ էլ ունեմ։։ Ինքս չեմ օգտվում քաղաքային տրանսպորտից, բայց պատրաստ եմ, բնականաբար, կրկին կանգնել ժողովրդի կողքին, եթե ժողովուրդը համամիտ չէ, եթե ցանկանում է պայքարել: Բայց, անկեղծ ասած, ես չեմ նկատում հանրային ընդվզում, որ ժողովուրդն այժմ այդպես ցավոտ է տանում քաղաքային տրանսպորտի թանկացումը, ինչպես տարիներ առաջ, ինչն էլ ինձ ստիպեց կանգնել ժողովրդի կողքին»։

Անի Քոչարի կարծիքով՝ իր պայքարն այս փուլում ինքնանպատակ կլինի, եթե ունենալով սեփական փոխադրամիջոց, պայքարի հասարակական տրանսպորտի թանկացման դեմ, այն դեպքում, երբ ժողովուրդը պայքար, ընդվզում չի անում. «Առհասարակ, վերջին տարիներին մեր ժողովուրդն ինչ-որ թմբիրի մեջ է: Չես հասկանում, թե ինչու հավուր պատշաճի արձագանք չի տալիս, օրինակ, ոչ թե միայն այս, այլ շատ ու շատ այլ արատավոր երևույթների:

Իսկ ինչ վերաբերում է տրանսպորտի թանկացմանը, որքանով հետևել և հասկացել եմ, ոչ թե տրանսպորտն է թանկանում, այլ նոր համակարգ է ներդրվում, որը բոլորովին այլ վճարման մոդել է, և որը շատ լավ է, եթե չունի թերություններ ու եթե հաշվի են առնվել բոլոր բացերը: Եթե համեմատեմ Եվրոպայի հետ, որտեղ շատ ճկուն համակարգ է գործում, այնտեղ մարդիկ նույնպես կարող են գնել անգամ մեկ տարվա տոմս, բայց այնտեղ կան նույնիսկ կարճաժամկետ տոմսեր։ Ես լսեցի՝ Ավինյանն ասաց, որ չի լինելու մեկանգամյա տոմս, ինչը սխալ է: Քանի որ եթե մարդն ընդամենը մի քանի կանգառ է գնալու և մեկ-երկու անգամ է օգտվելու տրանսպորտից, իրեն մեկ օրվա կամ մի քանի կանգառի համար նախատեսված տոմս է անհրաժեշտ լինելու: Ընդհանուր համակարգը պետք է ներդնել երկար քննարկումներից հետո, այլ ոչ թե այսպես հապշտապ, ոտքի վրա՝ առանց հաշվի առնելու նաև հանրային կարծիքը»:

Անին 8 տարի ապրել է Եվրոպայում, մասնավորապես, Գերմանիայում, որտեղ հասարակական տրանսպորտը չի կարելի համարել էժան, սակայն այնպիսի համակարգ է մշակված եղել, որ սոցիալապես անապահով խավը բոլորովին այլ տոմսից է օգտվել, իսկ վճարունակ մասսան՝ այլ. «Ամեն բան հաշվի էր առնված՝ հաշմանդամություն ունեցող մարդկանց, ուսանողների, դպրոցականների համար։ Ամեն խմբի համար կային տարբեր տոմսեր: Լավ բան է միասնական համակարգ ունենալը, սակայն այն, ինչ հիմա ես լսում եմ, բազմաթիվ թերություններ ունի»: