Մենք մեր գործողություններն ավարտել ենք. Կամո Ցուցուլյանը՝ Նոր Արեշում տեղի ունեցած պայթյունի մասին

ՆԳՆ ՓԾ-ի գործառույթը հետևանքների վերացումն էր, տուժածներին օգնություն ցուցաբերելը, մենք մեր գործողություններն ավարտել ենք: Այդ մասին այսօր՝ փետրվարի 5-ին, Երևանի Նոր Արեշ թաղամասում տեղի ունեցած պայթյունի վայրում լրագրողների հետ ճեպազրույցի ժամանակ ասաց ՓԾ տնօրեն-ներքին գործերի նախարարի տեղակալ Կամո Ցուցուլյանը:

«Վարկած չկա, ես վարկած չեմ կարող ասել: Պայթյուն է տեղի ունեցել, պայթյունի հետևանքով տուժածներ կան, մենք մեր աշխատանքները իրականացրել ենք»,- ասաց նա:

Հարցին՝ հնարավո՞ր է գազի արտահոսք է եղել, Ցուցուլյանը պատասխանեց՝ փորձաքննության արդյունքում պարզ կդառնա:

Հիշեցնենք, քոր այսօր՝ փետրվարի 5-ին՝ ժամը 11:36-ին, Ճգնաժամային կառավարման ազգային կենտրոն ահազանգ է ստացվել, որ Երևանի Նոր Արեշի 34-րդ փողոցում տեղի է ունեցել պայթյուն:

Փրկարարները նախ փլատակներից դուրս էին բերել Ռ․ Ն․-ին (ծնված 1938 թ․) և Հ․ Ս.-ին (ծնված 1994 թ․), ովքեր հոսպիտալացվել են բժշկական կենտրոն։ Բժիշկները Ռ․ Ն․-ի առողջական վիճակը գնահատել են բավարար, իսկ Հ․ Ս.-ինը՝ ծանր։

Ավելի ուշ փրկարարները փլատակներից դուրս էին բերել երկու մարդու ՝ մեկ տղամարդու եւ մեկ կնոջ: Ըստ նախնական տեղեկությունների՝ պայթյունից զոհված անձինք ամուսիններ են եղել՝ Հայկ Սողոմոնյան և Գայանե Եղոյան: «Հարեւաններից են նշել, որ բնակիչներ են եղել հարակից տանը: Հատուկ տեխնիկան կիրառվել է, որպեսզի փլատակները բարձրացնեն, կոնկրետ այդ հատվածում տանիք էր փլվել»,- լրագրողների հետ զրույցում ասել էր ՆԳՆ մամուլի քարտուղար Նարեկ Սարգսյանը: