2023թ. Ռուսաստանում կրկնակի ավելացել է օդային պատահարների թիվը. WSJ

2023թ. Ռուսաստանում զգալիորեն ավելացել է օդային պատահարների թիվը։ Այս մասին գրել է The Wall Street Journal-ը՝ հղում կատարելով հետազոտական ընկերություններին, որոնք ուսումնասիրում են բաց տվյալները։ Պարբերականը սա կապում է ավիացիոն ճյուղի դեմ մտցված պատժամիջոցների հետ 2022թ. փետրվարին Ուկրաինա ներխուժումից հետո։

Գերմանական Jacdec հետազոտական ընկերութան տվյալներով, որին հղում է կատարել The Wall Street Journal-ը, Ռուսաստանում 2023թ. տեղի է ունեցել առնվազն 19 ուղեւորի փոխադրման համար նախատեսված ինքնաթիռների հետ կապված 74 միջադեպ։ 2022թ. այդ միջադեպերը ընդամենը 36-ն էին։ Տվյալները հաստատում է նաեւ Cirium հետազոտական ընկերությունը, որի հաշվարկներով՝ Ռուսաստանում 2023թ. յուրաքանչյուր 100 հազար թռիչքին բաժին է ընկել մոտ 10 միջադեպ, այն դեպքում, երբ մեկ տարի առաջ այդ թիվը ընդամենը 5 էր։

Ընդ որում՝ անցած տարի Ռուսաստանում հաջողվել է խուսափել խոշոր օդային աղետներից։ Զոհերի թվով ամենամեծ աղետը մասնավոր ինքնաթիռի կործանումն էր, որի ժամանակ զոհվեցին «Վագներ» ՄՌԿ-ի հիմնադիր Եվգենի Պրիգոժինը եւ նրա մերձավորները. աղետի պատճառը պաշտոնապես պարզված չէ, հետաքննությունը գաղտնի է։

Պրիգոժինի ինքնաթիռի աղետից բացի՝ առավել ռեզոնանսային ավիամիջադեպը Նովոսիբիրսկի մարզում «Ուրալյան ավիաուղիների» ինքնաթիռի վայրէջքն էր հիդրոհամակարգի խափանման պատճառով։ Վթարային վայրէջքի ժամանակ ոչ ոք չի զոհվել։

Չնայած դեպքերի մեծ մասում հաջողվում է խուսափել լուրջ վնասից կամ մարդկանց զոհվելուց, մշտական տեխնիկական անսարքությունները մեծ ռիսկ են ստեղծում ուղեւորների համար եւ ավելացնում ճնշումն օդաչուների վրա, նշում են WSJ-ի կողմից հարցման ենթարկված փորձագետները։

Պատժամիջոցները նախատեսում են, մասնավորապես, արգելք արեւմտյան ինքնաթիռ արտադրող ընկերությունների համար, որպեսզի նրանք չսպասարկեն ռուսական ավիաընկերությունների ինքնաթիռները եւ պահեստամասեր չմատակարարեն նրանց։ Ավելի վաղ տեղեկացվել էր, որ մի շարք ռուսական ավիաընկերություններ վերանայել են իրենց տեխնիկական կանոնակարգերը եւ թույլ են տալիս թռչել անսարքություններ ունեցող օդանավերին։ «Ռոսավիացիան», սակայն, անցած տարվա դեկտեմբերին հայտարարել էր, որ Ռուսաստանի օդային տարածքում «չկա ավիացիոն միջադեպերի աճի միտում»։ Բայց տարբեր ԶԼՄ-ներ տարվա ընթացքում քանիցս տեղեկացրել են, որ այդ միտումը կա։ Մասնավորապես, սեպտեմբերին «Новая газета Европа»-ն Նովոսիբիրսկում վթարից հետո գրել է այն մասին, որ հունվար-օգոստոսին Ռուսաստանում տեղի է ունեցել ավելի քան 120 ավիապատահար՝ քաղաքացիական ինքնաթիռների հետ կապված, ինչը ավելի քան 2 անգամ ավելին է սովորականից։