«ՎԱԶ-2106»-ից գողացել է ձեռքի ժամացույց, 5 հազար դրամ և արևային ակնոց. ակնոցը ներկայացրել է ոստիկանություն

Ոստիկանության տարածած մամուլի հաղորդագրությունից տեղեկանում ենք․

«Աշտարակի քրեական հետախույզները ստացել էին օպերատիվ տեղեկություն, որ անցած տարվա նոյեմբեր-դեկտեմբեր ամիսներին Աշտարակ քաղաքի տարբեր վայրերում կայանված մեքենաներից կատարվել են գողություններ: Հետագա միջոցառումների արդյունքում հիմնավորվեց, որ գողությունները կատարել էր Աշտարակի Արարատյան փողոցի բնակիչ 27-ամյա մի երիտասարդ:

Բացատրական աշխատանքի արդյունքում հունվարի 24-ին երիտասարդը ներկայացավ բաժին, որտեղ էլ խոստովանեց արարքները:

Մասնավորապես, նոյեմբերի 15-ին Տիգրան Մեծի փողոցում կայանված «Հոնդայից», իսկ այս տարվա հունվարի 3-ին` Պռոշյան փողոցում կայանված «ՎԱԶ-2106-ից» փորձել էր կատարել գողություն, դեկտեբերի 14-ին Արամ Մանուկյան փողոցում կայանված «Ռենոյից» գողացել էր 87 հազար դրամ, երկու օր անց` վերոհիշյալ «ՎԱԶ-2106»-ից գողացել էր ձեռքի ժամացույց, 5 հազար դրամ և արևային ակնոց: Միակ պահպանված գողոնը` արևային ակնոցը, երիտասարդը հետը բերել էր բաժին:

Նույն օրը 27-ամյա երիտասարդը ներկայացվել է Արագածոտնի քննչական վարչություն, ապա տեղափոխվել ձերբակալվածների պահման վայր: Հանգամանքները պարզվում են»։