Սանդուն խորհրդակցություններ է սկսել ԵՄ-ին Մոլդովայի անդամակցության հանրաքվեի շուրջ

Մոլդովայի նախագահ Մայա Սանդուն առաջին խորհրդակցությունն է անցկացրել փորձագետների հետ՝ քննարկելու ԵՄ-ին հանրապետության անդամակցության շուրջ հանրաքվեն: «Արմենպրես»-ն այս մասին տեղեկանում է «ՌԻԱ Նովոստի»-ի հրապարակումից։

«Նախագահ Մայա Սանդուն հանդիպել է մի խումբ լրագրողների, քաղաքացիական հասարակության փորձագետների և հասարակական կարծիքի առաջնորդների հետ, որոնք ընդունել են Եվրամիությանը Մոլդովայի անդամակցության հանրաքվեն քննարկելու հրավերը: Հանդիպումն առաջինը դարձավ խորհրդակցությունների շարքից», - ասվում է նախագահի աշխատակազմի հրապարակած հաղորդագրության մեջ։

Սանդուն պարզաբանել է, որ նախաձեռնել է հանրաքվեն, որպեսզի քաղաքացիներն իրենց կամքն արտահայտեն երկրի ապագայի վերաբերյալ։ Նախագահը մտադիր է նմանատիպ խորհրդակցություններ անցկացնել տեղական համայնքների, մասնավոր հատվածի, քաղաքացիական հասարակության ներկայացուցիչների, հասարակական կարծիքի առաջնորդների, լրագրողների, տնտեսության և սոցիալ-մշակութային կյանքի տարբեր ճյուղերի ներկայացուցիչների, ինչպես նաև քաղաքական կուսակցությունների հետ:

Դեկտեմբերի 24-ին Սանդուն հայտարարել էր, որ մտադիր է իր թեկնածությունն առաջադրել երկրորդ նախագահական ժամկետի համար։ Բացի այդ, նա խորհրդարանին առաջարկել է հանրաքվե կազմակերպել, որպեսզի քաղաքացիները կարողանան իրենց կարծիքը հայտնել հանրապետության՝ Եվրամիությանն անդամակցելու վերաբերյալ։ Անցած տարվա վերջին խորհրդարանի անդամները կողմ են քվեարկել Ընտրական օրենսգրքում փոփոխություններին, որոնք ենթադրում են, որ Մոլդովայում հանրապետական ​​հանրաքվեն կարող է անցկացվել խորհրդարանական կամ նախագահական ընտրությունների օրը։