Ինչպես ազատվել ավելորդ քաշից կիվիի օգնությամբ

Կարճ ժամանակում մի քանի կիլոգրամ ավելորդ քաշից ազատվելու համար գոյություն ունեն բազմաթիվ մեթոդներ, սակայն դրանցից ոչ բոլորն են արդյունավետ ու անվնաս: Կիվիով դիետաներն այդ բազմաթիվ մեթոդներից են, սակայն ի տարբերություն մյուսների՝ այս դիետաներն իսկապես շատ արդյունավետ են: Ընդ որում՝ կիվին ոչ միայն չի վնասում, այլև նույնիսկ օգտակար է: Այս համեղ միրգն անչափ սննդարար և օգտակար է օրգանիզմի համար՝ հատկապես առավոտյան սոված փորին ուտելու դեպքում:

Ձեր ուշադրությանն ենք ներկայացնում կիվիով դիետաներ, որոնք կօգնեն շատ արագ մաքրել օրգանիզմը, այրել ավելորդ ճարպերն ու հագեցնել օրգանիզմն անհրաժեշտ վիտամիններով:

Կիվին պարունակում է կարնիտին՝ բուսական ծագման ճարպերն այրող միջոց, ինչպես նաև մանրաթելեր, վիտամին C, ֆլավոնոիդներ ու հակաօքսիդանտներ: Ընդ որում՝ այն ունի շատ ցածր կալորիականությունը, ուստի հիանալի միջոց է բեռնաթափման օր կազամակերպելու համար:

Առավոտյան սոված փորին մեկ հատ կիվի ուտելը շատ օգտակար է, սակայն միայն ստամոքսի խոցային հիվանդության ու գաստրիտի բացակայության դեպքում: Որոշ մարդիկ կիվի ուտում են առանց կեղևազրկելու, քանի որ այս մրգի կեղև նույնպես պարունակում է մի շարք օգտակար նյութեր ու մանրաթելեր: Չկեղևազրկված կիվին, իհարկե, ոչ բոլոր կուտեն, սակայն ամեն առավոտ ընդամենը մեկ կիվի ուտելն ուժ ու եռանդ կհաղորդի մարմնին ամբողջ օրվա համար:

Այս միրգն օգնում է մաքրել աղիները: Բացի այդ, իր պարունակած վիտամինների շնորհիվ այն նաև օգնում է չչարաշահել սննդամթերքն ու քիչ ուտել: Պարզվում է՝ շատ հաճախ մարդիկ անկառավարելի ախորժակ են ունենում օրգանիզմում որոշ նյութերի պակասի հետևանքով (օրինակ՝ ցինկի):

Կիվիով բեռնաթափման օր

Շաբաթական մեկ կամ առավելագույնը երկու անգամ կարելի է կազմակերպել բեռնաթափման օր, որի ընթացքում խորհուրդ է տրվում ուտել 6 հատ կիվի և խմել 1,5 լիտր անյուղ կեֆիր կամ առանց շաքարավազի և քաղցրացուցիչների յոգուրտ: Այս ընթացքում մարսողական համակարգը կհանգստանա, իսկ աղիները կմաքրվեն: Կիվիով բեռնաթափման օրվա ընթացքում կարելի է ազատվել մոտ 2 կգ ավելորդ քաշից:

Բեռնաթափման օրվա ընթացքում կարելի է խմել կոկտեյլներ: Կարելի է կեֆիրն ու կիվին խառնել կոտորակիչի օգնությամբ, մինչև դառնա համասեռ զանգված : Կարելի է նաև կոկտեյլը պատրաստելիս կիվիի փոխարեն օգտագործել նարինջ կամ հատապտուղներ, ինչը կօգնի օրվա սննդակարգն ավելի բազմազան դարձնել և ավելի հեշտ դիմանալ սննդի մեջ սահմանափակումներին: Ընդ որում՝ սննդակարգում կոկտեյլների առկայությունը ոչ մի կերպ չի ազդի բեռնաթափման օրվա արյունավետության վրա:

Կիվիով դիետաներ

Գոյություն ունեն նաև կիվիով դիետաներ, որոնք նույնպես հիանալի արդյունք են տալիս: Ձեր ուշադրությանն ենք ներկայացնում կիվիով դիետայի երկու տարբերակ, որոնք նախատեսված են մեկ շաբաթվա համար և երկուսն էլ շատ արդյունավետ են:

Կիվիով կանաչ դիետա

Նախաճաշ

Նախաճաշին հարկավոր է պատրաստել աղցան 1 կապ հազարով, 1 հատ բուլղարական պղպեղով, 1 կիվիով և 2 ճյուղ կանաչ սոխով: Աղցանին կարելի է ավելացնել 1 ճ.գ. ֆրանսիական մանանեխ կամ կիտրոնի հյութ:

Լանչ

Նախաճաշից երկու ժամ անց հարկավոր է պատրաստել կոկտեյլ 1 կանաչ խնձորով, 1 կիվիով և 1 բանանով: Հարկավոր է բոլոր բաղադրիչները լցնել կոտորակիչի մեջ և խառնել, մինչև դառնա համասեռ զանգված: Եթե կոկտեյլ պատարստելու հնարավորություն չկա, ապա կարելի է պարզապես ուտել մրգեր:

Ճաշ

Ճաշի համար հարկավոր է 3 ճ.գ. վարսակի փաթիլներին ավելացնել մեկ բաժակ բնական յոգուրտ, մի բուռ չամիչ, մանր կտրատված մանդարին ու կիվի, այնուհետև թրմել վարսակը մոտ 15 րոպե, խառնել և վայելել համեղ ուտեստը:

Հետճաշիկ

Հետճաշիկին հարկավոր է պատրաստել մրգային աղցան: Կտրատել 1 բանանը, 1 խնձորը և 1 կիվի, ավելացնել մի բաժակ կեֆիր կամ յոգուրտ և լավ խառնել: Ցանկության դեպքում կարելի է ավելացնել նաև մի պտղունց դարչին:

Ընթրիք

Ընթրիքին անհրաժեշտ է եփել մի փոքր շագանակագույն բրինձ և պատրաստել շատ յուրահատուկ, սակայն անչափ համեղ ու սննդարար աղցան: 50 գրամ եփած շագանակագույն բրնձին հարկավոր է ավելացնել 1 հատ կիվի, 1 հատ խնձոր կամ տանձ, հազարի թերթիկներ և մի բաժակ կեֆիր:

Քնելուց առաջ

Քնելուց առաջ կարելի է ուտել 1 հատ նարինջ կամ խմել մի բաժակ կեֆիր:

Կիվիով սպիտակուցային դիետա

Նախաճաշ

Նախաճաշին անհրաժեշտ է պատրաստել շատ համեղ աղցան 100 գրամ խաշած շագանակագույն բրնձով, 1 հատ մանր կտրատված կիվիով, 1 հատ քերիչով մանրացրած խնձորով և 30 գրամ «Ֆետա» պանրով: Աղցանի հետ կարելի է ըմպել նաև մեկ բաժակ կանաչ թեյ:

Լանչ

Լանչն կարելի է ուտել 1 հատ բանան և 1 հատ կիվի: Հնարավորության դեպքում հարկավոր պատրաստել մրգային կոկտեյլ. անհրաժեշտ է կոտորակիչով լավ խառնել 1 կիվին, 1 բանանն ու 1 կիտրոնը, մինչև ստացվի համասեռ զանգված:

Ճաշ

Ճաշին հարկավոր է պատրաստել ևս մի հրաշալի աղցան: 150 գրամ հավի խաշած փափկամիսը, կես թուրինջն ու 2 հատ կիվին կտրատել, ավելացնել մի փոքր կանաչ սոխ, 1 հատ մանր կտրատած խաշած ձու և լավ խառնել: Աղցանն անհրաժեշտ է համեմել մի փոքր աղով, պղպեղով, կիտրոնի հյութով ու 1 ճ.գ. ձիթայուղով:

Հետճաշիկ

Պատրաստել աղցան ½ բանանով, 2 կիվիով, 1 թ.գ. չամիչով և 200 գրամ անյուղ ու ոչ քաղցր յոգուրտով: Ցանկության դեպքում նման աղցան կարելի է պատրաստել նաև կեֆիրով:

Ընթրիք

50 գրամ «Ֆետա» պանիրն ու 2 հատ կիվին կտրատել, ավելացնել 50 գրամ խաշած շագանակագույն բրնձին և լավ խառնել: Աղցանը համեմել 1 թ.գ. ձիթապտղի յուղով և մի փոքր ռեհանով:

Քնելուց առաջ

Քնելուց առաջ կարելի է խմել մեկ բաժակ անյուղ կեֆիր կամ յոգուրտ, փոխանցում է Mediahub-ը։