Հայաստանում ԶՊՄԿ-ի համար առանձին օրենսգիրք կա՞, ինձ անօրինական կերպով ազատում են աշխատանքից․ ԶՊՄԿ-ի նախկին աշխատակից

Զանգեզուրի պղնձամոլիբդենային կոմբինատի մշակութային պալատի արդեն նախկին ադմինիստրատոր Արուս Պապյանը ԶՊՄԿ-ի կողմից ազատվել է աշխատանքից 2023 թվականի դեկտեմբերի 28-ից մինչև դեկտեմբերի 30-ը ներառյալ, 3 աշխատանքային օր, անհարգելի պատճառով աշխատանքի չներկայանալու համար: ԶՊՄԿ-ից Պապյանին ուղարկված նամակում մասնավորապես նշված էր, որ Պապյանի բացակայության հարգելիության հիմքերը բացակայել են:

Tert.am-ի հետ զրույցում Պապյանը մանրամասներ է պատմել տեղի ունեցածից։

Նրա խոսքով՝ սա առաջին դեպքը չէ, երբ իրեն ԶՊՄԿ-ից ազատում են աշխատանքից՝ անհիմն պատճառով։

«2018 թվականին, երբ աշխատում էի ԶՊՄԿ-ում, հեղափոխությանը մասնակցելու համար ինձ ազատել են աշխատանքից կադրերի բաժնի պետ Լիզա Իսրայելյանի հորդորով։ Այդ ժամանակ ես ընթացք չտվեցի դրան, մեկնեցի երկրից։ 6 տարի անց Քաջարանում իրավիճակ չի փոխվել փաստորեն։

Ես երեք օր բացակայել եմ աշխատանքից՝ ներկայացնելով համապատասխան փաստաթղթեր Կապանի բկ-ից, «Աստղիկ» բկ-ից։ Ունեցել եմ բրոնխիտ, հետազոտվել եմ նախ Կապանում, ապա «Աստղիկ» բկ-ում։ Թղթերը ներկայացրել եմ , կարճ ժամանակ անց գործավարը կանչել է ու ասել, որ ծանուցում է եկել՝ ինձ հեռացնելու են աշխատանքից։

Բոլոր թղթերը ունեմ, կարող եմ հրապարակել, պարզապես մեզ թույլ չեն տալիս դրանք հրապարակել, քանի որ ասում են մասնավոր ընկերություն է, իրավունք չունես ընկերության հետ կապված փաստաթղթերը հրապարակել։ Եթե իրենք արդար ու թափանցիկ են աշխատում, ինչի՞ց են վախենում։

Ստացվում է, որ ԶՊՄԿ-ի աշխատակիցները իրավունք չունեն իրենց հուզող խնդիրները, որոնք վերաբերում են ընկերությանը, հրապարակային բարձրաձայնել ։ Աշխատանքային օրենսգիրքը մեկը չի՞ Հայաստանում, թե ԶՊՄԿ-ի համար առանձին օրենսգիրք կա, ես չգիտեմ»,- ասաց Արուս Պապյանը։

Վերջինս նշեց, որ իրեն զարմացնում է, թե ինչու վարչապետ Նիկոլ Փաշինյանը երբեք չի արձագանքել ԶՄՊԿ-ի հետ կապված խնդիրներին։

«Ինչու է վարչապետ Նիկոլ Փաշինյանը միշտ լռում ԶՊՄԿ-ի հարցում, երբ խոսքը վերաբերում է ԶՊՄԿ-ին, ինչու է կառավարությունը լռում, գուցե գումարներ են տալիս բերանները փակո՞ւմ։ Քաջարանի բնակիչները ապրելով այստեղ, շնչելով այս կեղտոտ օդը, աշխատանք չունեն, բայց դրսից ռուսը գալիս է, այստեղ աշխատում։ Այստեղ առաջինը պետք է աշխատեն այն մարդիկ, ովքեր շնչում են այս թունավոր օդը, ոչ թե ազատվեն աշխատանքից։

Ինքս զոհված ազատամարտիկի դուստր եմ, հայրս 1992թ-ին Քաջարանի առաջին զոհն է եղել, հիմա ազատամարտիկի դստեր հացը երկրորդ անգամ կտրում են բացակաների համար այն դեպքում, երբ կան համապատասխան փաստաթղթեր։ Ես միանշանակ դատական գործընթաց եմ սկսելու՝ ինձ անհիմն ու ոչ օրինական կերպով աշխատանքից հեռացնելու համար։ Ես պնդում եմ, որ սա ԶՊՄԿ-ի մարդկային ռեսուրսների բաժնի ղեկավար Լիզա Իսրայելյանի արածն է, ով 2018-ին նույնպես ինձ անօրինական հեռացրել է աշխատանքից»,- ասաց Պապյանը։

Վերջինս նշեց, որ նախքան դատական գործընթաց սկսելը ցանկանում է հանդիպել ԶՊՄԿ -ի գլխավոր տնօրենի տեղակալ Արթուր Նիկողոսյանի հետ, ով այժմ, ըստ Պապյանի, Քաջարանում չի գտնվում։

«Ինչպես հասկացա Արթուր Նիկողոսյանը օնլայն կնիք է դրել, բայց դեռ հարց է՝ դա Նիկողոսյանն է դրել, թե Լիզա Իսրայելյանը»,- ավելացրեց Արուս Պապյանը։