Հայտնի է Գավառում մոր կողմից երեխային բռնության ենթարկելու դեպքով պատվիրատուն

Գավառում մոր կողմից երեխային բռնության ենթարկելու դեպքի գործով 3 մեղադրյալ կա, որոնք կալանավորված են: «Լուրեր»-ին ասել է ՀՀ քննչական կոմիտեի նախագահ Արգիշտի Քյարամյանը:

Նա նշել է, որ պատվիրատու անձ կա, որի համար նկարահանվել են այդ տեսանյութերը։ «Նա ևս ունի համապատասխան դատավարական կարգավիճակ: Նաև բացահայտվել է այն անձը, որը ի սկզբանե տարածել է այդ բովանդակությամբ տեսանյութը, նա ևս ունի մեղադրյալի կարգավիճակ»,- ընդգծել է ՔԿ նախագահը:

Պատվիրատուն կալանավայրից է, իսկ երեխայի հայրն այս գործով որևէ կարգավիճակ չունի: Կատարողը, պատվիրատուն, հրապարակողը բացահայտված են: Այս գործով անցնող բոլոր անձանց նկատմամբ որպես խափանման միջոց է ընտրվել կալանքը:

Ավելի վաղ հայտնի էր դարձել, որ գավառցի երեխայի նկատմամբ դաժան վերաբերմունք ցուցաբերած մորից՝ Աննա Արևշատյանից բացի, ևս մեկ անձի է մեղադրանք առաջադրվել։ Մեղադրյալը երեխաների հոր հետ կալանքի տակ գտնվող մեկ այլ կալանավոր է, որը մանկապղծության համար պատիժ է կրում:

Քննությամբ պարզվել էր, որ երեխաների մայրը նման տեսանյութերը պատրաստել, ուղարկել է իր ամուսնու հետ Նուբարաշենի բանտի նույն խցում կալանքի տակ գտնվող մեկ այլ կալանավորի։ Իսկ նման տեսանյութերի դիմաց երեխայի մորը խոստացել են սոցիալական աջակցություն։