Ճապոնիայում երկրաշարժի զոհերի թիվն աճում է. մարդիկ կորցրել են կապն արտաքին աշխարհի հետ

Ճապոնիայի Իսիկավա պրեֆեկտուրայի շրջանում տեղի ունեցած երկրաշարժի հետևանքով ավելի քան 780 մարդ զրկվել է արտաքին աշխարհի հետ կապից: Այս մասին Տոկիոյում կայացած մամուլի ասուլիսի ժամանակ հայտնել է Ճապոնիայի կառավարության գլխավոր քարտուղար Յոշիմասա Հայաշին։

Վերջին տվյալներով՝ երկրաշարժի հետևանքով զոհվել է 92 մարդ, 464-ը վիրավորվել են, պաշտոնապես անհետ կորած է համարվում 16 մարդ։

Փրկարարական-որոնողական գործողություններին մասնակցում է ինքնապաշտպանության ուժերի 4,6 հազար աշխատակից:

Հիշեցնենք` հունվարի 1-ի ցերեկը Ճապոնիայի Իսիկավա պրեֆեկտուրայում մի շարք հզոր երկրաշարժեր են տեղի ունեցել, որոնցից հետո Ճապոնիայի արևմտյան ափի որոշ շրջաններում ցունամիի վտանգ է հայտարարվել։ Ստորգետնյա ցնցումների հետևանքով շենքեր են ավերվել, դադարեցվել է ճեպընթաց գնացքների երթևեկությունը, ավելի քան 32 հազար տներում անջատվել է էլեկտրաէներգիան։