Ուկրաինական մի շարք քաղաքներում ուժեղ պայթյուններ են որոտացել, կան զոհեր ու վիրավորներ

Մի շարք հզոր պայթյուններ են տեղի ունեցել Կիեւում, Դնեպրում, ինչպես նաեւ Ուկրաինայի Օդեսայի, Խարկովի, Խմելնիցկիի, Նիկոլաեւի եւ Լվովի մարզերում: Դրա մասին դեկտեմբերի 29-ին հայտնել են ուկրաինական լրատվամիջոցները։

Առնվազն վեց պայթյուն է որոտացել Խարկովում: Խարկովին հասցված հարվածների հետեւանքով, ըստ նախնական տվյալների, մեկ մարդ զոհվել է, 8-ը վիրավորվել են: Ըստ քաղաքապետարանի՝ Խարկովի քաղաքացիական ենթակառուցվածքներին, մասնավորապես, բուժհաստատություններին, պահեստներին, քաղաքացիական ձեռնարկություններին եւ այլն լուրջ վնասներ են հասցվել։

Ըստ Խարկովի քաղաքապետ Իգոր Տերեխովի՝ քաղաքի վրա հարձակումների երեք ալիք է եղել: Խարկովի մարզի ոստիկանապետ Վլադիմիր Տիմոշկոն իր հերթին հայտնել է, որ Խարկովի Կիեւսկի շրջանում հիվանդանոցի շենք է վնասվել։

Suspilne-ի տեղեկություններով՝ պայթյունների հետեւանքով Դնեպրում այրվել է քաղաքի առեւտրի կենտրոններից մեկը։

Կիեւի քաղաքապետ Վիտալի Կլիչկոն էլ հայտնել է, որ քաղաքի Պոդոլսկի շրջանում պահեստ է այրվում, իսկ Կիեւի Սվյատոշինսկի շրջանում բեկորներ են ընկել: Ավերածությունների մասին տեղեկությունը ճշտվում է։