Բժիշկը զգուշացրել է հիպերտոնիկ հիվանդների համար ամանորյա սեղանին վտանգավոր մթերքների մասին

Թթու վարունգը, երշիկն ու շամպայնը խորհուրդ չի տրվում արյան բարձր ճնշում ունեցող մարդկանց, ասել է նյարդաբան Եկատերինա Դեմյանովսկայան։ «Իզվեստիա»-ի հետ զրույցում նա թվարկել է ամանորյա սեղանին տարածված այլ մթերքներ, որոնք վտանգավոր են հիպերտոնիկ հիվանդների համար։

Դեմյանովսկայան զգուշացրել է, որ ավելորդ աղը հեղուկ է պահում օրգանիզմում և արյան ճնշման բարձրացում է հրահրում։ Դա կանխելու համար նա խորհուրդ է տվել խուսափել թթու բանջարեղենից, ճաշատեսակներ պատրաստելիս օգտագործել նվազագույն աղ և ավելացնել կիտրոնի հյութ, խնձորի կամ բալզամիկ քացախ, չորացրած սխտոր՝ համը ընդգծելու համար: Բժիշկը նաեւ խորհուրդ է տվել քիչ ուտել նրբերշիկ, որը, բացի ավելորդ աղից, պարունակում է մոնոսոդիումի գլուտամատ, որը նվազեցնում է երիկամների՝ օրգանիզմից հեղուկը հեռացնելու ունակությունը։

«Հիպերտոնիկ հիվանդներին խորհուրդ է տրվում խուսափել քաղցր գազավորված ըմպելիքներից և շամպայնից»,-ասել է նա։

Դեմյանովսկայան նշել է, որ շամպայնը հակացուցված է հիպերտոնիայով տառապող մարդկանց նաև դրա մեջ ալկոհոլի պարունակության պատճառով, որն առաջացնում է արյան ճնշման ակնթարթային բարձրացում։

Նյարդաբանի խոսքով՝ այս ազդեցությունը կարճաժամկետ է, բայց կարող է առաջացնել հիպերտոնիկ ճգնաժամ, ուստի Ամանորի օրը նա խորհուրդ է տվել փրփրուն գինին փոխարինել չոր գինիով և խմել օրական 300 միլիլիտրից ոչ ավելի, փոխանցում է shantnews.am-ը։