Աննա Հակոբյանը «խաղաղության և համերաշխության ճաշի» է հրավիրել տարբեր երկրների և ազգային փոքրամասնությունների 17 ներկայացուցչի (լուսանկարներ, տեսանյութ)

Հայաստանի հանրապետության վարչապետի տիկին Աննա Հակոբյանի անունից դեկտեմբերի 27-ին Ամանորի առթիվ մատուցվել է ճաշ, որին հրավիրված են եղել ազգային փոքրամասնությունների ներկայացուցիչներ և Հայաստանում բնակվող օտարազգիներ:

«Ուրախալի է, որ այսքան շատ օտարազգիներ ապրում են Հայաստանում, մայրաքաղաք Երևանում: Այսօր պետք է լավ և ուրախ ժամանակ անցկացնել, ծանոթանալ ու անմիջական շփվել միմյանց հետ։ Մենք այսօր ինքներս մեզ և ամբողջ աշխարհին ցույց կտանք, թե ինչպես կարող են բարեկամաբար ուրախանալ ամենատարբեր երկրների և ազգությունների ժողովուրդները: Այսօրվա մեր միջոցառման մեջ ուզում եմ դնենք սիմվոլիզմ` մեր այս անհանգիստ ու խառը աշխարհում մենք ունենք սիրո կարիք, ջերմության կարիք, իրար բարի խոսքեր ասելու, իրարից բարի խոսքեր լսելու և իհարկե խաղաղություն զգալու, խաղաղություն տարածելու կարիք: Մեզ մաղթում եմ հաջողությամբ կատարել այդ առաքելությունն այսօր»,- ինչպես տեղեկանում ենք Աննա Հակոբյանի գրասենյակի տարածած հաղորդագրությունից, իր խոսքում ընդգծել է վարչապետի տիկինը:

Միջոցառման ընթացքում հնչել են բազմաթիվ կենացներ ու բարեմաղթանքներ, հյուրերն ասել են իրենց շնորհակալական խոսքերը, ներկայացրել իրենց կյանքի պատմությունները, գործունեությունը, որն իրականացնում են Հայաստանի Հանրապետությունում:

Նշվում է, որ վարչապետի տիկնոջ նախաձեռնած միջոցառումը` խաղաղության ու համերաշխության ճաշը, ապացուցում է, որ բոլորն այս աշխարհում կարող են ապրել միասին, համերաշխ, սիրո մթնոլորտում:

Հյուրերն իրենց ելույթների ընթացքում շնորհակալություն են հայտնել հայ ժողովրդին ու Կառավարությանը` Հայաստանում ջերմ ընդունելություն ստանալու համար: Վստահեցրել են` Հայաստանը իրենց շատ բան է տվել և բոլորը` թե´ ազգային փոքրմասնությունները, թե´ Հայաստանում բնակություն հաստատած օտարերկրացիները, պետք է իրենց ներդրումն ունենան Հայաստանի զարգացման, հզորացման, բարգավաճման գործում:

Միջոցառմանը հրավիրված էր ավելի քան 50 հյուր` ՀՀ-ում ազգային փոքրամասնություն համարվող բոլոր 11 ազգերի ու ՀՀ-ում բնակվող 16 երկրի ներկայացուցիչներ (ճապոնացի, չինացի, ուդի, հնդիկ, պարսիկ, հորդանանցի, ֆիլիպինցի, գանացի, նիգերիացի, սիրիացի, մոնղոլ, իրաքցի, իտալացի, ֆրանսիացի, ամերիկացի):

Միջոցառման ավարտին, սրահում դրված կտավի վրա նախ փակցվել է ավելի վաղ արված ընտանեկան լուսանկարը, ապա հյուրերը` յուրաքանչյուրն իր մայրենի լեզվով բարեմաղթանքներ են գրել, շնորհավորել գալիք 2024-ը: