Մենք կառչած չենք իշխանությունից․ ՔՊ-ական պատգամավոր

Գյումրու համայնքապետարանում «շունը տիրոջը չի ճանաչում»։ «Հրապարակ»-ին հասած տեղեկություններով՝ Գյումրիից ընտրված իշխանական պատգամավորներն են սկսել համայնքապետարանում շեֆություն անել, մասնակցել բյուջեի քննարկմանը, դժգոհություններ հայտնել, խանգարել նիստը։ Գրել էինք, որ նախօրեին Գյումրի համայնքի 2024 թվականի բյուջեն հաստատելու մասին հանրային լսումներին ներկա են գտնվել նաեւ ՔՊ-ական պատգամավորներ Կարեն Սարուխանյանը եւ Էմմա Պալյանը։ Իշխող ուժի պատգամավորները հանդես են եկել ընդդիմադիր դիրքերից՝ բողոքել են, թե քաղաքապետն իր թիմով նախորդ տարվա բյուջեի կատարողականը «պրավալ» է տվել։ 

«Հրապարակն» այս առնչությամբ զրուցել է Կարեն Սարուխանյանի հետ։

-Պարոն Սարուխանյան, ի՞նչ առաքելությամբ եք մասնակցել Գյումրու եկող տարվա բյուջեին վերաբերող հանրային լսումներին, ասում են՝ բոյկոտել եք, խանգարել քննարկումը։

- Չի եղել նման բան, ով նման բան է ասել՝ սուտ է ասել, հերթական հերյուրանքները կարող է լինել։ Շատ կառուցողական, հանգիտ, ջերմ քննարկում է եղել։ Բյուջեի վերաբերյալ մի քանի խնդիրներ կա, դրանց մասին եմ ես բարձրաձայնել։ Խոսքը՝ ֆոնդային մասի պլանավորմանն է վերաբերում։ Առաջարկել եմ ստեղծել աշխատանքային հանձնաժողովներ, աշխատանքային խումբ, որպեսզի հանրությունն իմանա, թե համայնքապատկան ինչ գույքեր կան, ինչ տարածքներ կան։ Ֆոնդային մասը այդ գույքերի եւ տարածքների օտարումից  է ձեւավորվում։ 2023թ․-ի բյուջեն չեմ կարող ասել, որ իդեալական է եղել եւ ամբողջությամբ պլանավորումը կատարվել է, հիմա նույն ձեռագրով էլ ուզում են պլանավորել 2024թ․-ի բյուջեն՝  նույն խնդիրներով։

-Գյումրի 2024թ․-ի բյուջեի վերաբերյալ քննարկմանը ներկա գտնվելու եւ խառնվելու իմաստը ո՞րն է, ի՞նչ հարց եք լուծում, Գյումրու ավագանին այդքան «թափ» չունի՝ համայնքի վերաբերյալ որոշում կայացնի, պարտադիր պետք է ՔՊ-ական պատգամավորները մասնակցե՞ն։

-Ես ԱԺ գյումրեցի պատգամավոր եմ, եւ նաեւ գյումրեցու տված քվեի արդյունքում եմ պատգամավոր դարձել, իմ այնտեղ գտնվելը լրիվ լեգիտիմ էր։ Մենք ուզում ենք հասկանալ, թե մեր քաղաքում ինչ է պլանավորվում։ 

-Դուք դժգոհեցիք, ասելով՝ թերակատարումներն է եղել 2023թ․-ի բյուջեի կատարողականում։ Տարվա ընթացքում, երբ դեռ ՔՊ-ն չէր խզել «Բալասանյան դաշինքի» հետ հուշագիրը եւ ՔՊ-ական փոխքաղաքապետերը  շարունակում են պաշտոնավարել, քանի՞ անգամ եք մասնակցել համայնքին վերաբերող քննարկումներին։ 

-Ես հաճախ եմ եղել, նույնիսկ ավագանու նիստի եմ ներկա եղել, այնպես որ քաղաքը մշտապես իմ ուշադրության կենտրոնում է։

-Ինչպե՞ս եք պատկերացնում Գյումրի համայնքի կառավարումը՝ հաշվի առնելով ստեղծված իրավիճակը։

-Կաշխատենք, կտեսնենք։ ՔՊ-ն Գյումրու քաղաքապետարանում ունի ավագանու 11 մանդատ եւ լիարժեք իրացնելու է այդ իրավունքը։ Դա օգնելու է մեր քաղաքի զարգացմանը։ Մենք հանդես ենք գալու ընդդիմադիր դիրքերից։ Հստակ է՝ եթե իշխանություն չես, հետեւաբար ընդդիմություն ես, այլ դիրք գոյություն չունի քաղաքականության մեջ։ Ես վստահ եմ՝ այս իրավիճակն օգնելու է մեր քաղաքին, եւ ծառայելու է հօգուտ գյումրեցու։ 

-Շուրջ 2 տարի ՔՊ-ն Գյումրիի համայնքապետարանում զբաղեցնում էր առանցքային խոշոր պաշտոններ․ փոխքաղաքապետերը ձերոնք էին։ Դժգոհում եք, թե 2023թ․-ի բյուջեն թերակատարումով է եղել, ՔՊ-ն պատասխանատվության իր բաժինը չունի՞,  ՔՊ-ականների ձեռքն ո՞վ էր բռնել, եւ ինչո՞վ էիք կաշկանդված, որ ընդդիմադիր դառնալուց հետո սկսեցիք դժգոհել քաղաքապետի աշխատանքից։ 

-Մենք մեղքը չենք գցում միայն «Բալասանյան դաշինքի» վրա։ Ամբողջ խնդիրը նրանում է, որ մեր այնտեղի թիմի եւ «Բալասանյան դաշինքի» աշխատանքի որդեգրած քաղաքականությունը տարբեր է եղել, եւ արդյունքում աշխատանքը չի ստացվել։ Մենք կառչած չենք իշխանությունից, մեր համար կարեւորը Գյումրու շահն է։ ՔՊ-ն իր բաժնի պետերի, մասնագետների, փոխքաղաքապետերի լծակները տալով՝  Գյումրու հետագա ճակատագիրը թողել է «Բալասանյան դաշինքի» վրա։  ՔՊ-ն ընդդիմադիր դիրքավորված՝ հետեւում է նրանց աշխատանքին։ 

-Ընդդիմադիր լինել, նշանակում է ունենալ նաեւ համայնքապետի թեկածու, քննարկում եղե՞լ է այս հարցով, ո՞վ է ՔՊ-ի քաղաքապետի թեկնածուն։

-Այս պահին թեկնածուի մասին կոնկրետ որոշում չունենք, ընթացքում կերեւա։ Հերթական ընտրություններին դեռ շատ շուտ է, շտապել պետք չէ։
 

Ամբողջական հոդվածը կարող եք կարդալ այս հասցեով՝ : https://hraparak.am/post/237edf7e166f1a4e1597ed5c5405ba0d?fbclid=IwAR1Oyzcjvgpz1XGnCIfrTIjr665OBG0Mp6kQ7xt5AeE4oEaQENy6ZSjNtho

© 2008 - 2021 «Հրապարակ օրաթերթ»