Վարդանյան եղբայրները հանդես են եկել ամանորյա կրկեսային շոու-ծրագրով

Վարդանյան եղբայրների Ամանորյա կրկեսային նոր «MAGIC CRYSTAL» շոու-ծրագիրը դիտելու հնարավորություն է տրվել հայ հանդիսատեսին։

Ակրոբատներ Վարդանյան եղբայրներից բացի հետաքրքիր համարներով հանդես են եկել կրկեսի այլ աստղերը ևս՝ ձեռնածուներ, ծաղրածու, տրապիզիստներ, լարախաղաց, դանակ նետողներ և աճպարարներ։

«MAGIC CRYSTAL» (« Կախարդական բյուրեղ») շոուն հագեցած և գունեղ է շոու է, ուր ներկայացվում է մի քաղաքի պատմություն, որտեղ բյուրեղն իրենց երջանկության հիմքն է, բայց մի օր հարկավոր է լինում պայքարել դրա համար։

Պատմությունը բյուրեղապակյա քաղաքի բնակիչների հետ պատահում է Ամանորի գիշերը։ Չար կախարդը գողանում է կախարդական բյուրեղը, որը մարդկանց տոնական տրամադրություն է բերում։

Այս քաղաքի երկու բնակիչներ՝ մնջախաղացը և բարի կախարդը մեկնում են վտանգավոր ճանապարհորդության, որ վերադարձնեն երջանկությունը բոլոր բնակիչներին և փրկեն տոնը:

Կրկեսային ցուցադրությունները կլինեն «Հրազդան» մարզադաշտի մոտ ՝ դեկտեմբերի 22-ից մինչև հունվարի 7-ը, ամեն օր ժամը 14:00-ին և 18:00-ին։