Ձկնորսներից մեկին կկալանավորեն, 26-ն արդեն ազատության մեջ են․ նոր մանրամասներ․ «Հրապարակ»

Օրերս ՆԳՆ ջրային պարեկների եւ ձկնորսների միջեւ տեղի ունեցած միջադեպից հետո ձերբակալված ձերբակալված 26 ձկնորսներից 25-ը ազատ են արձակվել արգելանքից։ Մեկ անձի ներկայացվել է մեղադրանք ՀՀ քրեական օրենսգրքի 452-րդ հոդվածի 4-րդ մասի 2-րդ կետով նախատեսված հանցավոր արարքը կատարելու համար։ «Հրապարակ»-ին հայտնեց ՀՀ Քննչական կոմիտեի մամուլի խոսնակ Գոռ Աբրահամյանը:

Դատարան միջնորդություն է ներկայացվել ձկնորսի նկատմամբ կալանքը որպես խափանման միջոց ընտրելու վերաբերյալ։

Ավելի վաղ գրել էինք, որ ՀՀ Քննչական կոմիտեից ձերբակալվածների վերաբերյալ տեղեկություն ստանալ չհաջողվեց, հեռախոսազանգերին չեն պատասխանում։ Վարույթն իրականացնող մարմինը նախաձեռնված քերական վարույթի եւ ձերբակալված 26 ձկնորսների վերաբերյալ երեկ հայտարարություն տարածեց, որում ասվում էր, որ Գեղարքունիքի մարզում տասնյակ անձանց մասնակցությամբ տեղի ունեցած՝ առարկայի գործադրմամբ կողոպուտի, մի խումբ անձանց կողմից մարմնական վնասվածք պատճառելու համար նախապես պատրաստված, հարմարեցված առարկայի և միջոցի գործադրմամբ և այդպիսիք գործադրելու սպառնալիքով խուլիգանության, ինչպես նաև պաշտոնատար անձի օրինական ծառայողական գործունեությանը՝ մարմնական վնասվածք պատճառելու համար նախապես պատրաստված և հարմարեցված առարկայի և միջոցի գործադրմամբ միջամտելու դեպքի հանգամանքները։ 

«ՆԳՆ ոստիկանությունից 2023թ. դեկտեմբերի 19-ին Քննչական կոմիտե ստացվել են հաղորդումներ և դրան կից փաստաթղթեր, համաձայն որոնց՝ 2023թ․ դեկտեմբերի 19-ին՝ ժամը 1240-ին, Ոստիկանության Գեղարքունիքի մարզի ջրային պարեկային ծառայության աշխատակիցները, «Սևան ազգային պարկ» ՊՈԱԿ-ի ծառայողների հետ, 2 նավակով ծառայություն են իրականացել Սևանա լճի Նորատուս բնակավայրի հատվածում։ Այդտեղ նրանց են մոտեցել մոտ 200 ձկնորսական նավակներ: Ըստ հաղորդման՝ դրանցում գտնվող դիմակավորված բազմաթիվ անձինք պարեկների և «Սևան ազգային պարկ» ՊՈԱԿ-ի նավերի վրա գտնվող անձնակազմի հասցեին հնչեցրել են հայհոյանքներ, սպառնացել են հրկիզել նրանց և նավերը, նրանց ուղղությամբ նետել են բենզինով լցված շշեր, փայտեր։ Ոմանց հաջողվել է բարձրանալ «Սևան ազգային պարկ» ՊՈԱԿ-ին պատկանող նավի վրա և վիճաբանել նավի վրա գտնվող աշխատակիցների հետ, ձեռքերով, ոտքերով, տարբեր առարկաներով հարվածել աշխատակիցներին, որոնցից մի քանիսը, նախնական տվյալներով, ստացել են տարբեր աստիճանի մարմնական վնասվածքներ:

Այդ ամենի ընթացքում պարեկային ծառայողները և ազգային պարկի աշխատակիցները նրանց հորդորել են դադարեցնել անօրինական գործողությունները և ենթարկվել իրենց օրինական պահանջներին։ Սակայն նավակներով մոտեցած անձինք շարունակել են ագրեսիվ գործողությունները, նրանցից մեկը դանակով կտրել է «Սևան ազգային պարկ» ՊՈԱԿ-ին պատկանող նավի հետնամասից կապված նավակին պահող պարանը և նավակը տարել: Պարեկային ծառայողների կողմից մոտ 2 կմ հետապնդվելուց հետո ձկնորսները հեռացել են»,-ասված էր հայտարարության մեջ:

Հիշեցնենք, որ Գեղարքունիքի մարզի Նորատուս գյուղում օրերս գերլարված իրավիճակ էր: Մարզի մի քանի գյուղերի ձկնորսները բողոքի ակցիա էին իրականացրել եւ երկկողմանի փակել Երևան-Սևան ավտոճանապարհը:

Ձկնորսների բողոքը պայմանավորված է Սեւանում ջրային պարեկների՝ ձկնագողության արգելքով: