Ղրղզստանը և Տաջիկստանը համաձայնեցրել են սահմանի ևս 47 կմ հատվածը

Ղրղզստանի և Տաջիկստանի ներկայացուցիչները հանդիպման ընթացքում համաձայնեցրել են պետական ​​սահմանի ևս 47,05 կմ հատվածը։ «Արմենպրես»-ի փոխանցմամբ՝ այդ մասին հաղորդում է Ղրղզստանի նախարարների կաբինետի մամուլի ծառայությունը։

«Ձեռք բերված համաձայնության համապատասխան՝ 2023 թվականի դեկտեմբերի 8-ից մինչև 14-ը Ղրղզստանի Հանրապետության Բատկենի շրջանի Բատկեն քաղաքում կայացել է Ղրղզստանի Հանրապետության և Տաջիկստանի Հանրապետության կառավարական պատվիրակությունների տեղագրական աշխատանքային խմբերի և իրավական հարցերով աշխատանքային խմբերի հերթական հանդիպումը` նվիրված ղրղզատաջիկական պետական ​​սահմանի սահմանագծմանը և սահմանազատմանը։ Այդ հանդիպմանը տեղագրական աշխատանքային խմբերը համաձայնեցրել են ղրղզատաջիկական պետական ​​սահմանի 47,05 կմ հատվածը», - ասված է հաղորդագրության մեջ։

Նաև նշվում է, որ կողմերը «մնացած հատվածների նկարագրման» աշխատանքը կշարունակեն հաջորդ հանդիպմանը, որը տեղի կունենա Տաջիկստանի տարածքում։

Ավելի վաղ Ղրղզստանի ազգային անվտանգության պետական ​​կոմիտեի ղեկավար Կամչիբեկ Տաշիևը հայտարարել էր, որ Բիշքեկն ու Դուշանբեն արդեն համաձայնեցրել են երկու երկրների միջև սահմանային գծի շուրջ 90%-ը։

Ղրղզստանի և Տաջիկստանի միջև պետական ​​սահմանի երկարությունը մոտ 980 կմ է։ Սահմանագծման շուրջ բանակցությունները շարունակվում են 2002 թվականի դեկտեմբերից։ Այս հարցի չկարգավորումը բազմիցս դարձել է բախումների պատճառ երկու հանրապետությունների սահմանամերձ շրջանների բնակիչների և զինվորականների մասնակցությամբ, այդ թվում՝ հրազենի գործադրմամբ։ Ընդհանուր առմամբ, 2014 թվականից ի վեր ղրղզատաջիկական սահմանին տեղի են ունեցել ավելի քան 10 լուրջ բախումներ։

Ղրղզստանը սահմանակից է Չինաստանին, Ղազախստանին, Ուզբեկստանին և Տաջիկստանին։ Սահմանի սահմանագծման և սահմանազատման գործընթացը մնում է ավարտել միայն տաջիկական կողմի հետ: