ԱՄՆ-ն վերջնաժամկետ է ներկայացրել. Իսրայելը խնդիր ունի կարճ ժամանակում հասնել նպատակներին. Սերգեյ Մելքոնյան

«Իսրայելի բանակն արդեն հասել է պլան մինիմումին՝ կարողացել է վերահսկողության տակ վերցնել Գազայի հյուսիսային հատվածը, շարունակում է ռազմական գործողությունները դեպի հարավ. գլխավոր նպատակն է ստեղծել բուֆերային գոտի։ Իսրայելը, իհարկե, չի հրաժարվի ավելի մեծ նպատակից՝ վերահսկողության տակ վերցնել Գազան ամբողջությամբ։ Դե, իսկ ռազմավարական նպատակն է վերացնել ՀԱՄԱՍ-ը՝ որպես կառույց. որպես գաղափարախոսություն դժվար թե կարճ ժամանակում ոչնչացնել հաջողվի»,-Aysor.am-ի հետ զրույցում նշել է միջազգայնագետ, իսրայելագետ Սերգել Մելքոնյանը։

«Իսրայելի ռազմաքաղաքական ղեկավարությունը ստիպված է մի շարք հումանիտար խնդիրներ հաշվի առնել. գործողությունների կաշկանդվածություն ունի։ Տարբեր հաշվարկներով Գազայի տակ 500 կիլոմետր թունել է փորված, Իսրայելի մտադրությունը՝ դրանք լցնել միջերկրածովյան ջրերով, ընդունելի չէ մի շարք երկրների կողմից։ Գերիների հարցը նույնպես օրակարգային է. Իսրայելի վարչապետն օրեր առաջ հայտարարեց՝ պետք չէ հուսալ, որ բոլոր գերիներին հնարավոր կլինի փրկել, ՀԱՄԱՍ-ը ոչ բոլոր գերիներին է ազատել՝ խաղարկում է հրադադարի ռեժիմի դիմաց, որպեսզի հնարավորություն ունենա վերախմբավորվելու»։

Սերգեյ ՄԵլքոնյանի գնահատմամբ՝ կոնֆլիկտի վերջին սրացումը չեզոքացրեց Իսրայելի ռազմական հետախուզության՝ աշխարհում առաջատար լինելու, ինչպես նաև զինտեխնիկայի միֆերը։

«Մենք տեսնում ենք, որ մարտերի ժամանակ Իսրայելը նոր-նոր սկսում է կիրառել զինատեսակներ, որոնք հայտնվեցին ուկրաինական ճակատում, համացանցում շրջանառվեցին նկարներ, որոնցում երևում է՝ որոշ ջոկատների տրվել են 60-ականների զրահաբաճկոններ։ Այդուհանդերձ, Իսրայելը փորձում է լոկալ օպերացիաներով թաղամաս առ թաղամաս առաջ գնալ․ մեծ ճակատ ընդգրկող պատերազմ չէ։

Իսրայելական և ամերիկյան փորձագիտական շրջանակներում գնահատական կա, թե ԱՄՆ-ն վերջնաժամկետ է ներկայացրել Իսրայելին. չի կարող հավերժ ռազմական, դիվանագիտական աջակցություն ցուցաբերել։ Իսրայելը խնդիր ունի իր առջև դրված նպատակներին հասնել կարճ ժամանակում»։

Սերգեյ Մելքոնյանն ընդգծում է՝ կոնֆլիկտի տրամաբանական հանգուցալուծումը կլինի երկու պետություն ստեղծելը. այդ մասին ոչ միայն Չինաստանը, Ռուսաստանն են խոսում, ԱՄՆ-ում նույնպես սկսել են խոսել հանգուցալուծման նման տարբերակի մասին։ Իսրայելն, այո, դիմադրում է այդ օրակարգին։