ԵՄ-ն դեկտեմբերի ընթացքում 1,5 միլիարդ եվրո կփոխանցի Ուկրաինային

Եվրահանձնաժողովի ներկայացուցիչ Անա Պիսոներոն Բրյուսելում կայացած ճեպազրույցի ժամանակ հայտարարել է, որ Եվրամիությունը պետք է Կիևին փոխանցի վերջին 1,5 միլիարդ եվրոն մինչև դեկտեմբերի վերջ՝ որպես այս տարվա բյուջեի 18 միլիարդ եվրոյի ընթացիկ ծրագրի մաս:

«ԵՄ-ն մտադիր է մինչև տարեվերջ 1,5 միլիարդ եվրո փոխանցել Ուկրաինային՝ որպես վերջնական վճար այս տարվա մակրոֆինանսական աջակցության 18 միլիարդ եվրոյի ծրագրի շրջանակներում», - ասաց նա:

Նա ընդգծել է, որ հետագայում ԵՄ երկրները պետք է համաձայնության գան մինչև տարեվերջ ԵՄ երկարաժամկետ բյուջեի վերանայման շուրջ՝ մինչև 2027 թվականը, որպեսզի հաստատեն Եվրոպական հանձնաժողովի նոր մակրոֆինանսական աջակցության 50 միլիարդ եվրո ծավալով ծրագիրը մինչև 2027 թվականը։

Այս մասին քննարկում տեղի կունենա դեկտեմբերի 14-15-ին կայանալիք ԵՄ գագաթնաժողովում։ Եվրահանձնաժողովի առաջարկի համաձայն՝ ԵՄ երկրները պետք է լրացուցիչ մուծումներ կատարեն իրենց բյուջեներից՝ Կիևի ֆինանսավորումն ապահովելու համար։ Եվրոպական մայրաքաղաքներում այս նախաձեռնությունը դեռ էնտուզիազմի չի արժանացել։