Պե՞տք է արդյոք դեղորայքով իջեցնել երեխայի ջերմությունը

Մի շարք հիվանդությունների մասին մարմինն ահազանգում է ջերմության բարձրացմամբ։

Փոքրիկների ծնողները երբեմն չեն կողմնորոշվում, թե ինչպես է հարկավոր իջեցնել երեխայի ջերմությունը և խուճապի են մատնվում։

ՀՀ առողջապահության նախարարությունը ներկայացրել է՝ երբ և ինչպես է հարկավոր իջեցնել երեխայի ջերմությունը և ինչ չի կարելի անել բարձր ջերմության դեպքում։

Այսպիսով, երեխայի ջերմությունը հարկավոր է իջեցնել, եթե այն 38,5 °C և բարձր է: Ջերմիջեցնող դեղորայքը նշանակվում է բժշկի կողմից՝ երեխայի քաշին կամ տարիքին համապատասխան դեղաչափով:

Ջերմությունն իջեցնելու համար կարելի է ձեռնարկել որոշակի միջոցառումներ.

Երեխային հաճախ կերակրեք, տվեք հեղուկներ, եթե երեխան ավելի մեծ տարիքի է:

Թեթև հագցրեք, մի ծածկեք և մի փաթաթեք:

Երեխային տվեք ջերմիջեցնող կամ ցավազրկող դեղեր բժշկի խորհրդով՝ ըստ երեխայի քաշի կամ տարիքի:

Մեկ ժամ անց նորից չափեք ջերմությունը:

Եթե հավելյալ հարցեր ունեք, զանգահարեք բժշկին:

Չի կարելի՝

Ջերմող երեխայի մարմնին հպել սառը իրեր: Դա կնպաստի մաշկի անոթների սպազմին:

Երեխայի մաշկի ջերմության իջեցումը վտանգավոր է, քանի որ այն կբերի ներքին օրգանների ջերմաստիճանի բարձրացման:

Մարմինը շփել սպիրտով կամ քացախով, քանի որ նշված նյութերը կարող են ներծծվել մաշկի միջոցով՝ առաջացնելով մաշկային թունավորում:

Եթե երեխայի մաշկը բարձր ջերմության ժամանակ վարդագույն է և խոնավ, կարող եք լինել համեմատաբար հանգիստ, քանի որ դա վկայում է, որ չեն խախտվել ջերմարտադրության և ջերմատվության գործընթացները:

Եթե բարձր ջերմության ժամանակ մաշկը գունատ է, ձեռքերն ու ոտքերը սառը, իսկ երեխան դողում է, դա վկայում է անոթների սպազմի մասին:

Այսպիսի դեպքերում պետք է բացառել բոլոր ֆիզիկական հովացնող մեթոդները՝ սառը ցնցուղ, սառը սավանով փաթաթելը և այլն:

Անհրաժեշտ է անհապաղ դիմել բժշկի:

Ի՞նչ դեղորայք ընտրել

Դեղորայքը ընտրելուց (հեղուկ, օշարակ, հաբ, մոմիկ) անհրաժեշտ է հաշվի առնել, որ դեղերը հեղուկ և օշարակ վիճակում ազդում են 20-30 րոպեի ընթացքում, մոմիկը՝ 30-45 րոպեի ընթացքում: Մոմիկն օգտագործում են, եթե երեխան փոքր է, փսխում է կամ հրաժարվում է դեղ խմել, փոխանցում է Aysor.am-ը։