«Հրապարակ». Գյումրու քաղաքապետը հրաժարական չի տալու

Գյումրու համայնքապետարանում արդեն երկրորդ օրն է՝ աշխատանքը պարալիզացված է։ Համայնքապետարանի ՔՊ-ական պաշտոնյաները հրաժարական են ներկայացրել ու հեռացել, քանի որ ՔՊ-ն խզել է «Բալասանյան դաշինքի» հետ 2 տարի առաջ կնքած համագործակցության հուշագիրը։ Մինչ ՔՊ-ն գործող քաղաքապետին պաշտոնանկ անելու ծրագրեր է կազմում, «Բալասանյան դաշինքից» վստահեցնում են՝ քաղաքապետը հրաժարական չի տալու։ «Վարդգես Սամսոնյանը հրաժարական չի տալու, չկա նման բան»,- մեզ հետ զրույցում ասաց դաշինքի ավագանու խմբակցության ղեկավար Տիգրան Հովհաննիսյանը։ Արդյո՞ք ՔՊ-ն` իր 11 մանդատով, կհաջողի քաղաքապետ Վարդգես Սամսոնյանին անվստահություն հայտնելու հարցում, կկարողանա՞ ներգրավել մյուս խմբակցությունների անդամներին, Հովհաննիսյանն ասաց՝ չգիտի, չի կարող ասել։ Բայց նշեց, որ Գյումրու ավագանու «Ապրելու երկիր», «Զարթոնք» եւ «Հանրապետություն» խմբակցություններին կոալիցիա կազմելու առաջարկ անելու որոշում այս պահին չունեն։ Գյումրու ավագանին ունի 33 մանդատ, ՔՊ-ի ունեցած 11 մանդատը բավարար չէ` անհրաժեշտ է 17 ձայն։ Ի՞նչ տեղի կունենա դեկտեմբերի 13-ին հրավիրված ավագանու նիստում, դեռեւս պարզ չէ։ Հովհաննիսյանն ասաց՝ քաղաքապետին անվստահություն հայտնելու գործընթաց չկա։ 

«Իշխանությունն ուզում է, որ Հայաստանի բոլոր համայնքապետերը լինեն ՔՊ-ական»,- մեզ հետ զրույցում ասաց Գյումրու ավագանու «Ապրելու երկիր» խմբակցության ղեկավար Կարեն Մալխասյանը։ Նա ասաց, որ 2 տարի Գյումրին կառավարած երկու ուժերին հարցեր ունեն տալու` իրենց համար անհասկանալի գործընթացներ են սկսվել։ ՔՊ-ն հուշագիրը խզելիս հայտարարել էր, որ Գյումրին չի կառավարվում Հայաստանի օրենսդրությամբ սահմանված կարգով, եւ «քաղաքում իրականացվում է ստվերային կառավարում»: «Ի՞նչ է սա նշանակում, այսինքն, կառավարությունը, իշխող ուժը չի կարող այդ, այսպես կոչված, ստվերային կառավարման հարցը կարգավորել, Գյումրու ՔՊ խմբակցությունը որոշեց փոխքաղաքապետներով դուրս գալ։ Ինչի՞ մասին է խոսքը»,- նկատեց Մալխասյանը։ Գյումրու ավագանու 2 մանդատ տնօրինող «Ապրելու երկիր» խմբակցության ղեկավարը նշեց նաեւ. ««Ապրելու երկիրը» ոչ մի համայնքում ՔՊ-ի հետ չի համագործակցել եւ չի համագործակցելու նաեւ Գյումրիում»։

Գյումրու ավագանու երեք ուժերից միայն «Զարթոնք» խմբակցության ղեկավար, անկուսակցական Վարդեւան Հակոբյանը մեզ հետ զրույցում չբացառեց ՔՊ-ի հետ հնարավոր համագործակցությունը՝ Գյումրու քաղաքապետ Վարդգես Սամսոնյանին պաշտոնանկ անելու գործընթացին։ «Ես խմբակցության ղեկավարն եմ, ես եմ որոշում կայացնելու` ես, անձամբ ես։ Այդպես է ստացվել, որովհետեւ ինքս անկուսակցական եմ եւ հուշագիր եմ ստորագրել «Զարթոնք» կուսակցության հետ՝ զուտ ընտրություններին մասնակցելու համար։ Այսինքն, ես ինքս եմ որոշելու՝ իմ թիմով»,- ընդգծեց Հակոբյանը` ակնարկելով, որ «Զարթոնքի» հետ համագործակցությունն ավարտվել է ընտրությունների փուլում։ «Զարթոնքը», հիշեցնենք, Արա Զոհրաբյանի կուսակցությունն է, որը կոշտ ընդդիմադիր կեցվածք ունի ՔՊ-ի հանդեպ: 4 մանդատ ունեցող «Զարթոնքի» ավագանիներն են Վարդեւան Հակոբյանը, Կարեն Սոսյանը, Սվետլանա Ադամյանը, Գոռ Մանուկյանը: Հակոբյանին հարցրինք՝ բացառո՞ւմ է ՔՊ-ի հետ համագործակցությունը։ «Ո՞վ է ասել նման բան, ես չեմ ասել, որ չեմ համագործակցի։ Չեմ կարող ուղիղ պատասխանել՝ կարող եմ համագործակցել, թե ոչ, ուղղակի չեմ բացառում, որ կգնանք այդ քայլին։ Ըստ իրավիճակի՝ կհասկանանք։ Միգուցե ՔՊ-ն է իր 11 մանդատով միանում ինձ»։ 

Իսկ մինչ այդ Գյումրու համայնքապետարանն արդեն երկրորդ օրն է՝ լիարժեք չի աշխատում․ աշխատանքից ազատման դիմումներ են գրել ոչ միայն ՔՊ-ական փոխքաղաքապետերը, այլեւ բաժնի պետեր, համայնքապետարանի ՔՊ-ական աշխատակիցներ։ Անդրադառնալով քաղաքապետարանում ստեղծված իրավիճակին՝ Հակոբյանն ասաց. կառավարումը ՔՊ-ն թողել է «Բալասանյան դաշինքին» ու հեռացել, նրանք էլ չեն կարողանում աշխատանքը լիարժեք կանոնակարգել։ «Իշխանությունը պատասխանատու է Գյումրու քաղաքապետարանի բնականոն աշխատանքի համար, բոլոր բաժինների աշխատողները, բաժնի պետերն աշխատանքից ազատման դիմումներ են գրել եւ դուրս եկել։ Որքան էլ «Բալասանյան դաշինքն» ասի, որ կարող է քաղաքացիներին լիարժեք սպասարկել, ես ասում եմ՝ չի կարող։ Աշխատանքից ազատման դիմումներ են գրել տասնյակ աշխատակիցներ, բաժնի պետեր, մասնագետներ։

Գյումրեցիները փաստի առաջ են կանգնել՝ այդ մարդիկ չկան, մի օրում գնացել են։ Ամենակարեւոր խնդիրը սա է»։ 

«Զարթոնք» կուսակցության նախագահ Արա Զոհրաբյանին հարցրինք` ինչպե՞ս է գնահատում խմբակցության ղեկավարի՝ ՔՊ-ին միանալու մտադրությունը։ «Զարթոնք ազգային քրիստոնեական կուսակցության դիրքորոշումը եւ ընդդիմադիր քաղաքական կեցվածքը չի փոխվել։ Գյումրիի հետ կապված գործընթացներն այս պահին չեմ մեկնաբանում, քանի որ դեռ ամեն ինչ պարզ չէ մեզ համար, եւ ավագանու անդամների հետ դեռ քննարկում չենք ունեցել: Սպասենք զարգացումներին»,-ասաց նա: