93-ամյա կնոջ սպանությունը բացահայտվել է. Ոստիկանությունը տեսանյութ է ներկայացրել

Դեկտեմբերի 1-ին հիվանդանոցից ՆԳՆ ոստիկանության Ստեփանավանի բաժին ահազանգ է ստացվել, որ շտապօգնության խումբը կանչով մեկնել է Լոռու մարզի Ագարակ գյուղ՝ 93-ամյա կնոջը բուժօգնություն ցույց տալու, սակայն նա մահացած է եղել, կան արյան հետքեր:

Նշված հասցե ոստիկանության Ստեփանավանի բաժնից օպերատիվ խումբ է մեկնել:

93-ամյա կնոջ դուստրը ոստիկաններին հայտնել է, որ ժամը 14.00-ին իր տան ննջարանի անկողնում հայտնաբերել է մոր դիակը:

Արտաքին զննությամբ դիակի գլխի շրջանում հայտնաբերվել են վնասվածքներ:

ՆԳՆ ՔՈԳՎ, ոստիկանության Լոռու մարզային վարչության, Ստեփանավանի և Տաշիրի բաժինների ծառայողների համատեղ ձեռնարկած օպերատիվ-հետախուզական միջոցառումների և Ստեփանավանի քննչական բաժնի ծառայողների քննչական գործողությունների արդյունքում հիմնավորվել է, որ 93-ամյա կնոջը սպանել է համագյուղացի 24-ամյա երիտասարդը:

Հետագա ձեռնարկված օպերատիվ-հետախուզական միջոցառումների շնորհիվ դեկտեմբերի 1-ի ժամը 20.05-ին ՆԳՆ ՔՈԳՎ ծառայողները երիտասարդին Երևան քաղաքի Իսահակյան փողոցի սրճարանի մոտ հայտնաբերել, ձերբակալել և տեղափոխվել են Քրեական ոստիկանության գլխավոր վարչություն, որտեղ անձնական խուզարկությամբ նրա մոտ հայտնաբերվել է սպանվածի բջջային հեռախոսը:

24-ամյա երիտասարդը և կազմված փաստաթղթերը ներկայացվել են Ստեփանավանի քննչական բաժին:

Ձեռնարկվում են միջոցառումներ՝ հանգամանքները և հանցագործության գործիքը հայտնաբերելու ուղղությամբ: