Մասիսի թիվ 4 դպրոցի ուսուցչուհին արցախցիներին բուլինգի՞ է ենթարկում․ ինչպե՞ս է մեկնաբանում իրավիճակը դպրոցի տնօրենը

Մասիս քաղաքի թիվ 4 դպրոցի մի խումբ աշակերտների ծնողներ բարձրաձայնում են՝ Հայոց լեզվի և գրականության ուսուցչուհի Արև Վրացյանը արցախցի երեխաների նկատմամբ վատ վերաբերմունք է դրսևորում։ «Նա հոգեպես անհավասարակշիռ անձ է, երեխաներին սպառնում է՝ դատի եմ տալու, արցախցի երեխայի ինքնակենսագրականը ճղել է՝ ասելով, թե կգնաս ձեր Արցախում այդ ամենը կգրես»,-Aysor.am-ին պատմեց ծնողներից մեկը, որը չցանկացավ ներկայանալ։

Հիշեցնենք, որ օրեր առաջ կառավարության նիստին ներկա երեխաներից մեկը դիմելով վարչապետ Նիկոլ Փաշինյանին՝ բարձրաձայնեց, որ Լեռնային Ղարաբաղից բռնի տեղահանված երեխաները դպրոցներում բուլինգի են ենթարկվում։ ԿԳՄՍ նախարար Ժաննա Անդրեասյանն ասաց, որ նման խնդիրներ կարող են լինել և կոչ արեց բոլոր երեխաներին, ովքեր ենթարկվում են բուլինգի, բարձաձայնել այդ մասին։

Դպրոցի տնօրեն Նարինե Բարսեղյանը Aysor.am-ի հետ զրույցում նախ փորձեց հասկանալ՝ ովքեր են բողոք ներկայացրել՝ ծնողնե՞րը, թե՞ ուսուցիչները, ապա հաստատեց, որ, այո՛, նա ոչ միայն աշակերտների, այլ նաև ուսուցիչների հետ խնդիր ունի, բայց չի կարելի ասել, որ ընդգծված միայն արցախցիների հետ է նրա խնդիրը։

«Այո՛, ինքը մի քիչ դժվար մարդ է, բայց ամբողջ դպրոցով կանգնել մեկի դեմ՝ ճիշտ չեմ համարում։ Ինքը մրցույթով է ընդունվել, դիպլոմը ստացել է և հիվանդանոցից էլ թուղթ է բերել, որ առողջ է, ես ոչինչ անել չեմ կարող։ Ես եթե մի ամբողջ դպրոցին հանեմ իր դեմ, կդառնա, որ իրեն ենք բուլինգի ենթարկում»,-ասաց նա։

Տնօրենը նշեց, որ մանկավարժական խորհրդի նիստ է հրավիրել, քանի որ ինքը դիմում էր գրել՝ ուսուցիչներից էր դժգոհում, ուսուցիչները՝ իրենից։

«Մոտ 130 երեխա եմ Արցախից ընդունել, բոլորին տեղավորել եմ, հնարավորության սահմանում օգնել եմ և իրեն հատուկ զգուշացրել եմ, որ արցախցի երեխաների նկատմամբ դու պարտավոր ես ունենալ նորմալ մարդկային վերաբերմունք, որովհետև նրանք առանց այդ էլ սթրեսի ենթարկված են, խոսել եմ իր հետ այդ թեմայով։ Այս ամենը զուտ իր անձի դեմ է, բայց ինքը գրագետ մասնագետ է, 39 տարեկան է, չամուսնացած, և իր առարկայից դուրս ոչինչ չի պատկերցնում, այս մարդու կյանքի իմաստը լեզուն և գրակնությունն է, ուզածն էլ, որ լռեն, որ դասն անի։ Այնպես չի, որ խնդիրը միայն արցախցիներն են»,-ասաց նա և կոնկրետ միջադեպ ներկայացրեց։

«Միջանցքում նկատում եմ արցախցի մի երեխայի, ով հեռախոսով իր մայրիկի հետ է խոսում և ասում, թե Վրացյանն ինձ թխել է։ Նարե էր անունը, գրկեցի հանգստացրեցի, հեռախոսով ծնողին ասեցի՝ եթե ժամանակ ունեք, եկեք, հասկանանք՝ ինչ է եղել»,-պատմեց տնօրենը և նշեց, որ թեև նաև ծնողի մոտ երեխան պնդում էր, որ ուսուցչուհին իրեն խփել է, դասարանցիները հակառակն էին ասում, որ ձեռքով միայն թեթև հրել է։

«Վրացյանին կանչելու համար երեխային ուղարկեցի, գնացել էր, ասել՝ մի հատ արի տնօրենի մոտ։ Ինքը վրդովված, որ երեխան իր հետ Դուք-ով չի խոսել, եկավ, ասաց՝ ընկե՛ր Բարսեղյան, այն երեխան, որ ինձ հետ դու-ով է խոսում, ես իրա ծնողի հետ ոչինչ խոսելու չունեմ ու դուրս եկավ։ Էս կինն էլ արագ հետևից բարձրացավ ու ուսուցիչների ներկայությամբ Վրացյանին ինչ խոսք մտքով անցավ՝ ասեց՝ էշ, և այլն։ Զգացի իրավիճակը լարվում է, զանգեցի ոստիկանություն, որ ոստիկանի ներկայությամբ հասկանանք, եթե հարվածել է, դա ուրիշ պատմություն է դառնում։ Պարզվեց, որ երեխային չի հարվածել, բայց էտ մարդու մոտ մնաց չէ՞ այդ վիրավորանքը։ Երբ հասկանում ես՝ էս մարդն այդքան էլ մեղք չուներ..., այնպես չի, որ ինքը տրամադրված է արցախցի երեխաների դեմ»,-ասաց նա։

Նարինե Բարսեղյանը նշեց, որ ինքը, երբ դպրոց է մտել՝ հաշվի է առել, որ իր գործը միայն ֆիզիկա սովորեցնելը չպետք է լինի, նաև երեխաներին սիրելն ու մարդ դաստիարակելը պետք է կարևորել։ «Այս մարդը այդպես չի մտածում, ինքը միայն իր առարկայի մեջ է՝ հայոց լեզու և գրականություն, ինքը վատ մասնագետ չի, երեխաները, եթե թույլ են տալիս, նորմալ դասեր է անցկացնում, եթե դասարանում աղմուկ չկա, ինքն իր գործը հանգիստ անում է, բայց եթե մենք դասարանում չենք, բնականաբար, իր դասը չի ստացվում»,-ասաց նա։

Տնօրենը նշեց, որ հարցի լուծումը տեսնում է նրանում, որ նախ և առաջ երեխաները և ծնողները ընդունեն նրան որպես այդ դպրոցի ուսուցիչ։

Հայոց լեզվի և գրականության ուսուցչուհի Արև Վրացյանի հետ խոսել չհաջողվեց, նա մեր զանգերին չպատասխանեց։