9-ամյա ազատված պատանդի մասին Իռլանդիայի վարչապետի թվիթը զայրացրել է Իսրայելի արտգործնախարարին

Իռլանդիայի վարչապետ Լեո Վարադկարի թվիթը, որով նա հայտարարել է ՀԱՄԱՍ-ի նախկին պատանդ Էմիլի Հենդի «կորած լինելու» մասին, զայրույթ է առաջացրել Իսրայելում:

Իռլանդիայի վարչապետը ողջունել է իննամյա իռլանդաիսրայելական ծագումով աղջկա ազատ արձակումը` այն անվանելով «մեծ ուրախության և թեթևության օր Էմիլի Հենդի և նրա ընտանիքի համար»:

«Կորած անմեղ երեխան այժմ գտնվել և վերադարձվել է, և մենք թեթևացած շունչ ենք քաշում: Մեր աղոթքները լսվեցին»,- գրել է Վարադկարը X-ի իր միկրոբլոգում։

Այս թվիթը զայրացրել է Իսրայելի արտգործնախարար Էլի Քոենին, որն ընդգծել է, որ Էմիլին ոչ թե կորել էր, այլ առևանգվել։

Նա տեղեկացրել է, որ պարոն Վարադկարի հայտարարությունից հետո կանչել է Թել Ավիվում Իռլանդիայի դեսպանին «նկատողության համար»:

«Պարոն վարչապետ, կարծես թե, կորցրել եք ձեր բարոյական ուղենիշները և իրականությամբ ստուգման կարիք ունեք։ Էմիլի Հենդը «կորած չի եղել», նրան առևանգել է ավելի վատ ահաբեկչական կազմակերպություն, քան ԻԳԻԼ-ը, որը սպանել է իր խորթ մորը: Էմիլին և ավելի քան 30 այլ իսրայելցի երեխաներ պատանդ են վերցվել ՀԱՄԱՍ-ի կողմից, իսկ դուք՝ Լեո Վարադկար, փորձում եք օրինականացնել և նորմալացնել ահաբեկչությունը։ Ամոթ ձեզ»,- գրել է Քոենը X սոցիալական ցանցի իր միկրոբլոգում։

Աղբյուրը