Միջանկյալ կարգավիճակը նշանակում էր ԼՂ-ի պետական կարգի վերացում և նոր համակարգի ձևավորում․ վարչապետ

ՀՀ վարչապետ Նիկոլ Փաշինյանը պարզաբանեց, թե ինչ էր ենթադրում Լեռնային Ղարաբաղին միջանկյալ կարգավիճակի տրամադրումը, նաև անդրադարձավ ընդդիմադիր որոշ շրջանակների այն թեզին, թե իբր Ռուսաստանի Դաշնությունն իր քայլերով պատժում է Հայաստանի իշխանություններին այս կամ այն քայլերի համար։ Ինչպես տեղեկացնում է «Արմենպրես»-ը, Հայաստանի վարչապետ Նիկոլ Փաշինյանն ուղիղ եթերում նշեց, որ շատ ակտիվ շրջանառվում է այն թեզը, որ 44-օրյա պատերազմով Ռուսաստանի Դաշնությունը Հայաստանի իշխանություններին պատժեց իշխանության ինչ-որ քայլերի համար։

«Նախ ես չէի ուզի Ռուսաստանի Դաշնությունը այս համատեքստում քննարկման առարկա դարձնել, բայց եկեք այդ թեզը լրջորեն քննարկենք։

Բա այդ դեպքում 2016 թվականի քառօրյա պատերազմի ժամանակ ո՞վ և ո՞ւմ և ինչի՞ համար պատժեց։ Այդ թեզի իմաստն այն է, որ դե հեղափոխություն եղավ, հեղափոխությունը ցանկալի չէր մեր գործընկերների համար, իբր այս կառավարությունը արևմտամետ էր, դրա համար պատժվեց, դրա համար եղավ։ Բա 2016 թվականի քառօրյա պատերազմը ինչի՞ համար եղավ, բա 2013 թվականի իրադարձությունները ի՞նչ էին, որ Հայաստանը բանակցեց, բանակցեց Ասոցացման պայմանագիր ստորագրելու վերաբերյալ և արևմտյան աշխարհի հետ ձեռքբերված պայմանավորվածությունները մեկ օրում շրջեցին, մեկ էլ պարզվեց Հայաստանը մի գիշերում դառնում է Եվրասիական տնտեսական միության անդամ։ Բա ո՞ր քայլերի համար էր, որ 2011 թվականին Ռուսաստանը բազմամիլիարդանոց զենքի պայմանագիր կնքեց Ադրբեջանի հետ։ Բա այդ դեպքում 2013-14 թվականների իրադարձությունները ինչի՞ արձագանքն էին։

44-օրյա պատերազմի հանգամանքներն ուսումնասիրող ԱԺ քննիչ հանձնաժողովից հետո շատերն ասում են, որ Ղարաբաղի հարցի հետ կապված ինչ կար՝ ամբողջը ասացիր։ Իրականում այդպես չէ։

Ղարաբաղի հետ կապված ինչ կա՝ ամբողջը չասեցի։ Շատ բան կա ասելու Ղարաբաղի հարցի մասին, որովհետև եթե այդ վարկածը ճիշտ է, ապա Սերժ Սարգսյանի 2018 թվականի ապրիլի հայտարարությունը ինչի՞ մասին էր՝ պատերազմի անոնսը։ Այդ ինչի՞ անոնս էր, երբ ասում էր, որ երկար ժամանակ հույս չունենանք, որ Ադրբեջանը կթողնի պատերազմով Ղարաբաղի հարցը լուծելու իր մոտեցումը և բանակցային գործընթացը կանգնած է»,- ասաց Փաշինյանը։

Վարչապետը որոշ մանրամասներ հայտնեց 2018 թվականի դրությամբ Լեռնային Ղարաբաղի հարցի հետ կապված բանակցային իրավիճակից։

«Մենք այսօր քննարկում ենք Լեռնային Ղարաբաղի հետ կապված հայտնի որոշումը՝ ԼՂ-ի պետական կազմավորման լուծարման մասին, բայց լավ, ի վերջո, պե՞տք է անդրադառնանք այն թեմային, որ Սերժ Սարգսյանի կողմից գովաբանված միջանկյալ կարգավիճակը ինչ էր 2016 թվականի օգոստոսի դրությամբ և 2018 թվականի հեղափոխությունից առաջ առկա բանակցային իրավիճակը։ ՄԱԿ-ի Գլխավոր ասամբլեայում բանաձև էր նախատեսվում ԼՂ-ի սեփական կյանքի կազմակերպման եղանակների և միջոցների մասին, որը ՄԱԿ-ի Անվտանգության խորհուրդը պետք է ընդուներ ՄԱԿ-ի գլխավոր քարտուղարի առաջարկով, որը պետք է քննարկեր Ադրբեջանի, ԵԱՀԿ Մինսկի խմբի համանախագահների և Հայաստանի Հանրապետության հետ։ Այդ միջանկյալ կարգավիճակը ի՞նչ էր նշանակում։ Դա նշանակում էր Լեռնային Ղարաբաղում գոյություն ունեցող պետական կարգի վերացում և նոր համակարգի ձևավորում։ Այդ ինչի՞ մասին են խոսում։

Ես խոսում եմ 2018 թվականի դրությամբ առկա բանակցային իրադրության և բովանդակության մասին։ Այսինքն՝ հասկանում եք, որ ՄԱԿ-ի Անվտանգության խորհրդում, ըստ այդ փաստաթղթերի, Լեռնային Ղարաբաղը պետք է ստանար իր կյանքի կազմակերպման վերաբերյալ որոշում, որը պետք է լիներ Լեռնային Ղարաբաղի կարգավիճակը մինչև հարցի վերջնական կարգավորումը։ Այս նախադասությունների տակ ինչ է թաքնված՝ որ Լեռնային Ղարաբաղում այդ պահից սկսած գոյություն ունեցած կարգը և կարգավիճակն, իր որոշ առանձնահատկություններով, պետք է զրոյացվեր և նորը ստեղծվեր այն ըմբռնմամբ, որ Մադրիդյան սկզբունքների շրջանակներում Լեռնային Ղարաբաղը հայերից և ադրբեջանցիներից կազմված կազմավորում է, և ինչքան հայերը պետք է մասնակից լինեին Լեռնային Ղարաբաղի կառավարմանը, այնքան էլ ադրբեջանցիները։ Ինչքան էլ նախորդ իշխանությունը փորձի ժխտել, սա դիվանագիտության տառերը ճանաչող մարդու համար աքսիոմա է, և այդ թղթերը կան։ Դա ապացուցելի և անառարկելի բան է»,- հայտարարեց Նիկոլ Փաշինյանը։