Արցախը երբևէ վտանգ չի ներկայացրել ՀՀ-ի համար․ Հակոբյանը՝ Սիմոնյանին․ MediaHub

Իշխանությունները դեմ են Հայաստանում Արցախի պետական ինստիտուտների պահպանմանն ու գոյությանը, ավելին, այսօր ԱԺ նախագահ Ալեն Սիմոնյանն ասել է, որ այստեղ պետինստիտուտներ պահելու, զարգացնելու նպատակ չի տեսնում և համարում է, որ դա Հայաստանի անվտանգությանը ուղիղ սպառնալիք է և հարված։

Այս թեմայի շուրջ MediaHub-ը զրուցեց Արցախի ԱԺ պատգամավոր Մետաքսե Հակոբյանի հետ։

«Հայաստանի իշխանությունները տարբեր բարձրախոսներով են նման արտահայտություններ անում և ընդհանրապես այդ կեղծ թեզերը տարածում, որ ժողովրդին պահեն մոլորության մեջ, որ Արցախը տալով իրենք հանգիստ ապրելու են։ Արցախը հանձնելով իրենք ամենամեծ վտանգի մեջ դրեցին Հայաստանն ու շարունակում են ավելի մեծացնել ու խորացնել վտանգները։ Արցախը երբևէ չի եղել ու չի կարող խախտել ՀՀ անվտանգային որևէ բաղադրիչ։ Հակառակը՝ Արցախը միշտ եղել է, և նույնիսկ այս վիճակում կա անվտանգության երաշխավոր՝ ՀՀ դարպասը ու վահանը»,- ասաց Հակոբյանը։

Ըստ պատգամավորի՝ այն ամենը, որ պետք է տեղի ունենա Հայաստանում, որոնք լի են վտանգներով և մեծացնում են ՀՀ շուրջ վտանգը, սա պատճառաբանություն է, որ արդեն իսկ այդ գործընթացները չսկսած իրենք մեղավորներ կարողանան կարգել։

«Իշխանությունները նույն ոճի մեջ են»,- շեշտեց մեր զրուցակիցը։

«Իսկ Արցախը երբևէ վտանգ չի ներկայացրել ու նույնիսկ այս իրավիճակում սպառնալիք չէ ՀՀ համար»,- ընդգծեց նա։

«Մեր համար կարևորագույն խնդիր է ՀՀ անվտանգությունը։ Եվ այսօր մեզնից լավ որևէ մեկը չի պատկերացնում դրա կարևորությունը։ Իսկ եթե մենք Հայաստանում ունենայինք այնպիսի իշխանություն, որոնք կաջակցեին պետինստիտուտների պահելուն... Բայց տեսնելով վերաբերմունքը՝ հասկանում ենք, որ իմաստ չունի նման բան սպասել։ Արցախի իշխանություններն ու կառավարությունը պետք է դա անեն ինքնուրույն։ Նույնը պետք է անի ԱԺ-ն, որն Արցախի ժողովրդի առաջնային մանդատ ունի։ Եվ որևէ կերպ անգործության մատնելու իրավունք չունեն։ Որևէ իշխանություն չի կարող հավերժ լինել, բայց Արցախի հարց փակելը հանցագործություն է հայ ժողովրդի նկատմամբ»,- ասաց ընդդիմադիր պատգամավորը։

MediaHub-ը օրերս զրուցել էր Արցախի ԱԺ «Ազատ հայրենիք-ՔՄԴ» խմբակցության պատգամավոր Արամ Հարությունյանի հետ, որը նշել էր, թե պատգամավորների մեծ մասը ստիպված են լինելու ուրիշ աշխատանք գտնել այլ ոլորտներում, քանի որ կենցաղային խնդիրները լուծելու համար աշխատանք է պետք։

Մետաքսե Հակոբյանը նշեց, որ երեկ արցախցի պատգամավորները հանդիպում են ունեցել և նրանք համամիտ են, որ անգործությունը ևս հանցագործություն է, և պակաս դավաճանության քայլ չէ։

«Յուրաքանչյուրը պետք է աշխատանք գտնի, քանի որ պատգամավորի գործունեությունը հասարակական հիմունքներով է։ Եվ չի խանգարելու մեր գործունեությանը։ Չնայած, ինչ խոսք, մեծ մասին շատ դժվար է աշխատանք գտնել»,- եզրափակեց պատգամավորը։