Նախաձեռնել ենք զինվորական հագուստի փոփոխություն. Սուրեն Պապիկյան

Այս տարի նախաձեռնել ենք զինվորական հագուստի փոփոխություն, ԱԺ ամբիոնից այդ մասին հայտարարեց պաշտպանության նախարար Սուրեն Պապիկյանը։

«Դա լոկ մի հագուստի գույնը մյուսով փոփոխելու նախաձեռնություն չէ, դա նաև բովանդակային փոփոխություն է։ Հաշվի առնելով հանգամանքը, որ դա պետք է հանրության կարծիքն արտահայտի և համապատասխանի բոլոր միջազգային չափանիշներին, մենք բաց մրցույթ ենք հայտարարել՝ նպատակ ունենալով ներգրավել Հայաստանում առկա բոլոր մասնագետներին, ովքեր կարող են ներկայացնել իրենց պատկերացումները նոր համազգեստի վերաբերյալ», - ասաց Պապիկյանը։

Նախարարը նշեց, որ հայկական մի շարք ընկերություններ մասնակցել են, որակավորման առաջին փուլն անցել են.

«Երկրորդ փուլի համար միայն մի զորատեսակի համար են հայտ ներկայացրել, մնացածի մասով, ցավոք, երկրորդ փուլում մասնակիցներ չենք ունեցել։ Աշխատում ենք մեր միջազգային գործընկերների հետ, առաջիկա օրերին կստանանք առաջարկներ, դրանք կադապտացնենք մեր պատկերացումներին, հայկական սիմվոլիկային, դրա արդյունքում արդեն մրցույթ կհայտարարենք։ Մենք չենք ձախողելու»,-հայտարարեց Սուրեն Պապիկյանը։