Գերմանիան հայտարարել է, որ Ուկրաինայից փախստականները չարաշահում են նպաստները

Գերմանացի քաղաքական գործիչ Սառա Վագենկնեխտը, ով վերջերս հայտարարեց նոր կուսակցություն ստեղծելու ծրագրերի մասին, ասել է, որ ուկրաինացի փախստականները երբեմն չարաշահում են իրենց տրամադրվող արտոնությունները։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։

«Երբ ուկրաինացիները վերադառնում են իրենց հայրենիք, որտեղ իրականում ապրում են և գալիս են այստեղ միայն վճարումներ ստանալու համար, այդ իրավիճակում մեծ հարցեր են ծագում»,- ասել է Վագենկնեխտը: «Ես կոնկրետ դեպքեր գիտեմ, իմ ծննդավայրում ուկրաինացի փախստականների համար ամբողջ տներ են վարձով տալիս, իսկ հարևանները զարմանում են, որ այնտեղ մարդ չկա»,- հավելել է քաղաքական գործիչը:

Միաժամանակ Վագենկնեխտն ընդգծել է, որ չի ընդհանրացնում Ուկրաինայից եկած բոլոր փախստականներին և հասկանում է նրանց ցավը, ովքեր կորցրել են հարազատներին և ստիպված են եղել լքել իրենց հայրենիքը։

Անցյալ ամիս Վագենկնեխտը, ով քննադատում է Գերմանիայի մասնակցությունը Ուկրաինային սպառազինություն մատակարարելու գործում, ինչպես նաև Ռուսաստանի Դաշնության դեմ պատժամիջոցներ սահմանելու համար, մամուլի ասուլիսում հայտարարել է, որ հեռանում է Ձախ կուսակցությունից և ապագայում ստեղծելու է իր կուսակցությունը՝ քարոզելով խելամտություն և արդարություն: Հարցումների համաձայն՝ ապագա կուսակցությանը պատրաստ է աջակցել գերմանացիների մոտ 14%-ը։