Արսեն Թորոսյանը դատի է տվել Սոֆիա Հովսեփյանին՝ զրպարտությունը հերքելու, վիրավորանքի համար ներողություն խնդրելու և փոխհատուցում վճարելու պահանջով

ԱԺ «Քաղաքացիական պայմանագիր» խմբակցության պատգամավոր, Առողջապահության նախկին նախարար Արսեն Թորոսյանը քաղհայց է ներկայացրել «Իմ քայլը» խմբակցության նախկին պատգամավոր Սոֆյա Հովսեփյանի դեմ։ Երեկ, անդրադառնալով Մարինա Խաչատրյանի դեմ իր կողմից ներկայացված քաղհայցով դատարանի վճռին, Թորոսյանը ֆեյսբուքյան իր էջում մասնավորապես գրել էր․ «Նման մի անձի մասով էլ դատարանը մի որոշ ժամանակ առաջ է վարույթ ընդունել իմ հայցադիմումը»։

«Նման անձ» ասելով՝ պատգամավորը ենթադրաբար նկատի ունի հենց Սոֆյա Հովսեփյանին, որի դեմ քաղհայց է ներկայացվել զրպարտություն հանդիսացող փաստացի տվյալները հերքելու, վիրավորանքի համար ներողություն խնդրելու և փոխհատուցում վճարելու պահանջով։ Դատարանը օգոստոսի 30-ին գործն ընդունել է վարույթ։ Datalex.am-ից տեղեկացանք նաեւ, որ դատարանը բավարարել է օրենքով նախատեսված հայցի ապահովման միջոցը, դատաքննության օր է նշանակվել նոյեմբերի 10-ը։

Նախկին պատգամավոր Հովսեփյանը, որը 44-օրյա պատերազմի ավարտից հետո լքեց խմբակցությունն ու համալրեց իշխանության անողոք քննադատների շարքը, այս տարվա մարտին իր ֆեյսբուքյան էջում Մարինա Խաչատրյանի՝ դատական հայցի առիթ դարձած ստատուսի մոտիվներով գրառում էր արել։ Թե․ «Կարող է մի օր նաև պարզեք, թե ո՞նց արսեն թորոսյանը` օգտագործելով զոհվածների ԴՆԹ անալիզ անելու փաստը, լկտիաբար մեծ գումարներով գնեց նոր ԴՆԹ սեկվենատոր, որի ոչ միայն կարիքը չկար, այլ նաև որևէ կերպ իրենց խոստացած ժամկետում չարեց նույնականացումը, բայց զատո 250մլ դրամ մտերիմ կազմակերպությամբ ֆռռացրեցին։ ․․ Հարցումներ արել եմ, պատասխաններն ու ստերն ունեմ, ուղարկել եմ բոլոր օղակներով և ՞ …»։

Որեւէ փաստ կամ ապացույց իր գրառմանը կից Հովսեփյանը չի ներկայացրել, ոչ էլ հրապարակել է իր հարցման պատասխանները։