Նիկոլ Փաշինյանը նման բան չի ասել․ Գևորգ Պապոյանը՝ Տիգրանաշենը հանձնելու մասին

Բանավոր խոստումների տրամաբանությամբ Հայաստանը երբեք ոչինչ չի խոստացել, Հայաստանը հայտարարել է, որ պատրաստ է սահմանների դելիմիտացիայի ու դեմարկացիայի 1974-75թթ քարտեզներով։

Այս մասին ԱԺ-ում լրագրողների հետ զրույցում ասաց իշխանական պատգամավոր Գևորգ Պապոյանը։

«Այդ քարտեզներով նույն Տավուշի մարզում մենք ունենք 7-8 գյուղեր, որոնց վարելահողերը ամբողջովին գտնվում են Ադրբեջանի վերահսկողության տակ։ Քարտեզով, որ նայում ենք, սահմանը զիգզագաձև է, իրական սահմանը մի փոքր ուղիղ է։

Հիմա տարբերակներից մեկը կարող է լինել այն, որ սահանը այդ մասով կարող է մնալ այն տեսքով, ինչ տեսքով կա։ Մյուս տարբերակով, ենթադրենք ինչ-որ վարելահողեր, որոնք մեր գյուղերն են պատկանել, պետք է անցնեն Հայաստանին։ Դեմարկացիան ու դելիմիտացիան հենց այդ գործընթացն են, որի արդյուքնում ՀՀ տարածքը պետք է լինի 29․800 քա կմ։

Խաղաղության պայմանագրի կարևորագույն դրույթներից մեկը հետևյալն է՝ պետք է ամրագրվի ՀՀ տարածքային ամբողջականությունը՝ 29․800 քա կմ-ն, ճանապարհների ապաշրջափակումը, տևական խաղաղությունը և այլն։ Կարծում եմ, որ խաղաղության պայմանագրում չպետք է լինեն դրույթներ, որոնք իրենց մեջ «ռումբեր» կարող են պարունակել»,- ասաց Պապոյանը:

Խոսելով Տիգրանաշենի մասին և անդրադառնալով լրագրողի այն դիտարկմանը, որ Փաշինյանն է խոսել Տիգրանաշենը հանձնելու մասին, Պապոյանն ասաց․

«Նիկոլ Փաշինյանը նման բան չի ասել։ Այդ 8 գյուղերի մասին խոսում եք դուք, Հիքմեթ Հաջիևը և Ալիևը»։