Մենք կներառենք թոշակների և նպաստների գծով ծախսերը ԼՂ-ից բռնի տեղահանված մեր հայրենակիցների մասով, որը կավելացնի մեր կենսաթոշակային ծախսերը մոտ 30 միլիարդ դրամով․ Ֆինանսների նախարար

«Կուզեի ևս մեկ անգամ կրկնել, որ ԼՂ-ից բռնի տեղահանված մեր հայրենակիցների հետ կապվասծ ծախսերը 2024 թվականի բյուջեի նախագծի մեջ ներառված չեն, այն հիմնական անելիքները, որը մենք պետք է անենք 2024 թվականին, հասկանալի պատճառով։ Եվ պատճառն այն է, որ բյուջեն կառավարության կողմից հաստատվել է սեպտեմբերի վերջին օրերին և այդ օրերին մենք ժամանակ չունեինք, որպեսզի նոր ծրագրեր նախագծեինք, հստակ պատկեր չկար մարդկանց քանակի և իրավիճակի վերաբերյալ, և ըստ այդմ մենք քննարկեցինք նաև այն, որ երկրորդ ընթերցմամբ նախագիծը քննարկվելուց առաջ մենք կներկայացնենք նաև այդ հավելյալ ծախսերը»,-այդ մասին այսօր ԱԺ Ֆինանսավարկային եւ բյուջետային հարցերի մշտական հանձնաժողովի նիստում Հայաստանի Հանրապետության 2024 թվականի պետական բյուջեի մասին նախագծի քննարկման ժամանակ ասաց ՀՀ ֆինանսերի նախարար Վահե Հովհաննիսյանը։

Նա նաև որպես նախնական տեղեկություն հայտնեց, որ իրենք կներառեն թոշակների և նպաստների գծով ծախսերը ԼՂ-ից բռնի տեղահանված մեր հայրենակիցների մասով, որը կավելացնի մեր կենսաթոշակային ծախսերը մոտ 30 միլիարդ դրամով և իրենք վաղը կառավարության նիստով կհաստատեն կենսաթոշակների օրենքի փոփոխությունների վերաբերյալ նախագիծը, որը կուղարկվի ԱԺ, որը նաև հնարավորություն կտա Աշխատանքի և սոցիալական հարցերի նախարարությանը վճարել ԼՂ-ից տեղահանված թոշակառուների թոշակներն այնպես, ինչպես իրենք ստացել էին, երբ իրենք գտնվում էին ԼՂ-ում։

«Մյուս տարի, բացի թոշակների և նպաստների վճարումներից պատրաստվում ենք իրականացնել նաև աշխատանքային ծրագրեր, աշխատունակ տարիքում գտնվող մարդկանց համար վերապատրաստումների և աշխատանքի տեղավորման աջակցության ծրագրեր, ինչպես նաև բնակարանային ապահովության ծրագրեր։ Այս ամենը հիմա գտնվում է մշակման փուլում և եթե որևէ բան մենք չհասցնենք մինչև բյուջեի ընդունումը վերջնական հաստատել, ապա մենք այդ գումարները կնախատեսենք պահուստային ֆոնդում և այնուհետև տարվա ընթացքում դա հաստատվելուց հետո պահուստային ֆոնդից հատկացումներ կլինեն»,-ասաց նախարարը։