Այ մարդ, ես ի՞նչ գործ ունեմ Արցախի հետ, է․ Նիկոլայ Ծատուրյան

Վերջին շրջանում Հայաստանում քաղբանտարկյալների թիվն օրեցօր է ավելանում, գրել է «Հրապարակ»-ը։

Այսօր տեղեկացանք, որ ֆեյսբուքում «բռնության կոչեր» անելու համար կալանավորվել է նախկին պատգամավոր Արագած Ախոյանը, ով հունիսի 8-ին իր ֆեյսբուքյան էջում գրառում է արել․ «Ցուցակագրեք էն բ․․․ թուլեքի ցանկը, որոնց սատկացնելու ենք նիկոլի սիկ․․․ հետո»: Արգիշտի Քյարամյանի Քննչական կոմիտեն 5 ամիս անց հայտնաբերել է այդ գրառումը, մտածել է, որ այն բռնության կոչ է պարունակում (հավանաբար՝ սերունդներին ուղղված, քանի որ եթե 5 ամսում այն հետեւանք չի ունեցել, ուրեմն դա մեր ժամանակակիցներին չի ուղղված) եւ ձերբակալել են Ախոյանին, մտել դատարան եւ որ ամենասոսկալին է՝ այս մեղադրանքի հիման վրա դատարանն Արագած Ախոյանին մեկամսյա կալանք է սահմանել։

Հայաստանը մի քաղբանտարկյալով էլ «հարստացավ»։ Ի՞նչ կարծիք ունեն այս իրադարձությունների մասին, այսպես կոչված, հայրենի մտավորականները՝ գրողներ, դերասաններ, երաժիշտներ, գիտնականներ, ռեժիսորներ և այլն:

«Հրապարակ»-ը մի քանի հարց է ուղղել ժողովրդական արտիստ, ռեժիսոր, դասախոս Նիկոլայ Ծատուրյանին, ով հայտնի է իր իշխանամետ հայացքներով:

- Պարոն Ծատուրյան, ի՞նչ կարծիք ունեք ֆեյսբուքյան գրառումների համար մարդկանց կալանավորելու հանգամանքի հետ կապված:

- Ոչ մի բանի չեմ հետևում, չգիտեմ, երկու բեմադրություն եմ անում ու ամբողջ օրը զբաղված եմ դրա ուղղությամբ: Ժամանակ չկա ուրիշ բաներով զբաղվելու:

- Այսինքն` ոչ մի բանի չե՞ք հետևում:

- Չէ, հիմա չեմ հետևում:

- Իսկ Արցախի հետ կապված իրադարձությունների մասին ի՞նչ կասեք:

- Այ մարդ, ես ի՞նչ գործ ունեմ Արցախի հետ, է: Ինձ հետ գործ չունեք:

- Այսինքն` Արցախի հետ գործ չունե՞ք:

- Ամեն ինչի հետ գործ չունեմ: Ես երկու բեմադրություն եմ անում, առավոտից երեկո փորձերի մեջ եմ:

- Իսկ եթե մի օր պատերազմը մեր դուռը թակի և հայրենիք չլինի, որտե՞ղ եք ձեր բեմադրություններն անելու:

- Լավ, վերջացավ, ցտեսություն: