Բեխտերևի հիվանդություն․ ախտանշաններից է նաև պարանոցի ցավը

Բեխտերևի հիվանդությունը կամ առանցքային սպոնդիլոարթրիտը բորբոքային հիվանդություն է, որը ժամանակի ընթացքում կարող է առաջացնել ողնաշարի որոշ ոսկորների՝ ողերի սերտաճում:

Այսպիսի սերտաճումը ողնաշարը դարձնում է ավելի քիչ ճկուն և կարող է հանգեցնել առաջ թեքված՝ կռացած կեցվածքի: Եթե ախտահարվում են կողոսկրերը, նաև կարող է դժվարանալ խորը շնչելը:

Առանցքային սպոնդիլոարթրիտն ունի երկու տեսակ: Երբ վիճակը հայտնաբերվում է ռենտգեն հետազոտությամբ, կոչվում է անկիլոզացնող սպոնդիլիտ, որը նաև հայտնի է որպես առանցքային սպոնդիլոարթրիտ: Երբ վիճակը հնարավոր չէ տեսնել ռենտգենով, սակայն հայտնաբերվում է ախտանիշների, արյան թեստերի և այլ պատկերային հետազոտությունների հիման վրա, կոչվում է ոչ ռադիոգրաֆիկ առանցքային սպոնդիլոարթրիտ:

Ախտանիշները սովորաբար ի հայտ են գալիս վաղ հասուն տարիքում: Բորբոքումը կարող է ընդգրկել օրգանիզմի այլ շրջանները ևս, առավել հաճախ՝ աչքերը:

Անկիլոզացնող սպոնդիլիտը վերջնական բուժում չունի, սակայն բժշկի նշանակումները և խորհուրդները կարող են օգնել, որ մեղմացնեք ախտանիշները և, որոշ դեպքերում, դանդաղեցնեք հիվանդության հարաճուն զարգացումը:

Անկիլոզացնող սպոնդիլիտի վաղ ախտանշանները կարող են ներառել մեջքի ցավ և մեջքի գոտկային շրջանի և ազդրերի վերին հատվածի կարկամություն (քարանալու և դժվարաշարժության զգացում), հատկապես առավոտյան և անգործության ժամանակաշրջաններից հետո:

Պարանոցային ցավն ու հոգնածությունը նույնպես տարածված են: Ժամանակի ընթացքում ախտանիշները կարող են վատթարանալ, բարելավվել կամ դադարել՝ անկանոն ընդմիջումներով:

Առավել հաճախ տուժող շրջաններն են՝

ողնաշարի հիմքի և կոնքին միջև գտնվող հոդ (սրբոսկրա-զստային հոդ),

ողնաշար, հատկապես՝ գոտկային հատված,

այն շրջանները, որտեղ ջլերը և կապանները միանում են ոսկորներին, հիմնականում ողնաշարի հատվածում, իսկ երբեմն՝ կրունկի ետևի երկայնքով,

կրծոսկրի և կողոսկրերի միջև ընկած աճառներ,

ազդրի վերին հատվածի և ուսագոտու հոդեր:

Պետք է դիմել բժշկի, եթե կա մեջքի ստորին հատվածի՝ գոտկատեղի կամ հետույքի շրջանում ցավ, որն առաջանում է դանդաղորեն, ուժեղանում է առավոտյան կամ գիշերվա երկրորդ կեսին և հատկապես, եթե ցավը մեղմանում է շարժումների ժամանակ և սաստկանում հանգստի ժամանակ: Անմիջապես դիմել ակնաբույժի, եթե առաջանում է ցավ և կարմրություն աչքերում, ուժեղ լուսազգայունություն կամ մշուշոտ տեսողություն, փոխանցում է Aysor.am-ը։