Շատ ինտենսիվ զբաղվում ենք թե՛ բարձրաստիճան պաշտոնյաների, թե՛ մյուս անձանց գերեվարման ու խոշտանգման հարցով․ Քյարամյան

ՀՀ քննչական կոմիտեն Լեռնային Ղարաբաղի տարածքում տեղի ունեցած դեպքերի առնչությամբ քննություն իրականացնելու իրավունք չունի։ Այս մասին լրագրողների հետ զրույցում ասաց ՔԿ նախագահ Արգիշտի Քյարամյանը։

«Բայց կան միջազգային մարդասիրական իրավունքի խախտումներ` ագրեսիվ պատերազմ, պատերազմական հանցագործություններ, մարդկության դեմ ուղղված հանցագործություններ, այդ թվում` էթնիկ զտումը, որը ցեղասպանության հանցակազմի տարր է, որոնցով քննություն իրականացվում է։ Կա հարուցված քրեական վարույթ, որը վերաբերում է մինչև ռազմական գործողությունները տեղի ունեցած իրողություններին՝ 2022 թվականի դեկտեմբերից Լաչինի միջանցքի ապօրինի արգելափակումը ու այդ կերպ էթնիկ զտման համար նախադրյալներ ստեղծելը: Բոլորս ականատես եղանք, որ կարճ ժամանակահատվածում ավելի քան 100 հազար մարդ մահվան սպառնալիքի տակ ստիպված լքեց իր բնօրրանը։ Վարույթը նաև դրան է վերաբերում»,- նշեց Արգիշտի Քյարամյանը։

Անդրադառնալով սեպտեմբերի 19-20 ռազմական ագրեսիայի ընթացքում գերեվարված 16 անձի՝ 6 զինծառայողի և 10 քաղաքացիական անձին՝ Քյարամյանը նշեց, որ քննույուն է իրականացվում, կան նաև ոչ բարձրաստիճան պաշտոնյաներ, որոնց գերության փաստը հաստատված է, շատ ինտենսիվ զբաղվում են թե՛ բարձրաստիճան պաշտոնյաների, թե՛ զինծառայողների, թե՛ քաղաքացիական անձանց գերեվարման ու խոշտանգման հարցով

Ինչ վերաբերում է Արցախի ԱԽ նախկին քարտուղար Սամվել Բաբայանին և Արցախի նախագահ Սամվել Շահրամանյանին հարցաքննության հրավիրելուն, ապա Քյարամյանը ո՛չ հերքեց, ո՛չ հաստատեց ՝ նշելով, որ կան վարույթներ, որոնցով նախաքննությունը հրապարակման ենթակա չէ։