Անդրանիկ Բերբերյանի երաժշտությամբ միանգամից երեք ֆիլմ է ցուցադրվել «ՌեԱնիմանիա» փառատոնի ծրագրում

Կոմպոզիտոր, դիրիժոր, երաժշտական պրոդյուսեր Անդրանիկ Բերբերյանի հեղինակած երաժշտությամբ միանգամից երեք ֆիլմ ներառված էր հոկտեմբերի 22-28-ն անցկացվող «ՌեԱնիմանիա» անիմացիոն ֆիլմերի և պատկերապատման արվեստի միջազգային 15-րդ փառատոնի ծրագրում։

«Արմենպրես»-ի հաղորդմամբ՝ փառատոնի շրջանակում ցուցադրվել և տարբեր ծրագրերում ընդգրկված են եղել Բերբերյանի երաժշտությամբ «Ավրորայի լուսաբացը» (ռեժիսոր՝ Իննա Սահակյան), «Սևանիկ» (ռեժիսոր՝ Հարություն Թումաղյան), «Վերադարձ դեպի ռոք» (ռեժիսոր՝ Գոռ Ենգոյան) անիմացիոն ֆիլմերը։

«Որպես կոմպոզիտոր՝ ինձ համար մեծ պատիվ է, որ նման բարձր կարգի միջազգային կինոփառատոնում ներկայացված է իմ երաժշտությամբ միանգամից երեք կինոնկար։ Փառատոնը, որը նվիրված է նաև հայկական անիմացիայի և հայ կինոյի հոբելյաններին, լավ հարթակ է ներկայացնելու անիմացիոն ոլորտի արդի զարգացումները։ Որպես կոմպոզիտոր՝ մշտապես մեծ հետաքրքրություն եմ ցուցաբերել անիմացիոն ֆիլմերի նկատմամբ և բոլորովին այլ մոտեցում՝ անիմացիոն ֆիլմի համար երաժշտություն ստեղծելու համատեքստում։ Ուրախ եմ, որ ցուցադրություններին հանդիսատեսը մեծ ուշադրություն է դարձրել ոչ միայն ֆիլմերին, այլ նաև երաժշտությանը»,-նշում է Անդրանիկ Բերբերյանը։

Ֆիլմերի հնչյունային հետարտադրական աշխատանքները կատարվել են Berberyan Production Studios-ում:

Անդրանիկ Բերբերյանը հեղինակել է մի շարք հայտնի ֆիմերի երաժշտություն «Արմատներ» (2016թ.), «Կյանք ու կռիվ», «Կյանք ու կռիվ 2» (2017թ.), «Էրկեն կիշեր» (2018թ.), «Կաֆկայի երազը» (2020), «Սողոմոնի երգերը» (2020թ.), «Ավրորայի Լուսաբացը» (2022), «Ամերիկացի» (2022), «Nowhere» (2023) և այլն:

Հեղինակել է երաժշտություն տարբեր ժանրերի ավելի քան 30 ֆիլմերի, երաժշտություն նվագախմբերի, անսամբլների և սոլո երաժշտական գործիքների համար։