Իսրայելից տարհանման նոր թռիչք դեռ չի նախատեսվում. ՀՀ սփյուռքի գործերի գլխավոր հանձնակատար

Տարհանման թռիչքից հետո մենք անընդհատ կապի մեջ ենք հայ համայնքի հետ՝ հասկանալու համար, թե արդյոք հավելյալ թռիչքի կարիք կա։ Այս մասին NEWS.am-ի թղթակցի հետ զրույցում ասաց Հայաստանի սփյուռքի գործերի գլխավոր հանձնակատար Զարեհ Սինանյանը։

«Բնականաբար, 2-3 քաղաքացու համար ինքնաթիռ ուղարկել չենք կարող, պետք է կրիտիկական զանգված ստեղծվի, որի հիման վրա էլ որոշում կկայացվի։ Կրիտիկական զանգվածը դեռ չի ձևավորվել։

Իսրայելի հյուսիսում էսկալացիայի սրման մտավախությունը, մեծ հաշվով, չիրականացավ: Ըստ այդմ, հայ համայնքում լարվածությունը փոքր-ինչ թուլացել է։ Այնուամենայնիվ, դա կարող է փոխվել ցանկացած պահի: Հայ համայնքի կամ Հայաստանի քաղաքացիների շրջանում զոհերի մասին տեղեկություններ չկան»,- նշել է նա։

Սինանյանը տեղեկացրեց, որ Իսրայելից տարհանված հայերի մեծ մասը Հայաստանում են ժամանակավոր հիմունքներով։ «Միայն գիտենք, որ մեկ ընտանիք ցանկություն է հայտնել մնալ Հայաստանում»,- նշել է պաշտոնյան։

Հիշեցնենք, որ հոկտեմբերի 16-ին Թել Ավիվից տարհանման թռիչք էր կազմակերպվել, որով դուրս էին բերվել Հայաստանի 200 քաղաքացիներ և Իսրայելի հայ համայնքի ներկայացուցիչներ։