Ինչպես է Հայաստանի դրոշը հայտնվում Ադելի ձեռքում (լուսանկար, տեսանյութ)

Երգչուհի Ադելը շարունակում է իր համերգային շրջագայությունը: Լաս Վեգասում ելույթից հետո համացանցում տեսանյութ է տարածվել, որում երգչուհին զրուցում է հանդիսատեսի հետ, իսկ ձեռքին հայկական եռագույնն է:

BRAVO.am-ին հայտնի է դարձել, որ Հայաստանի դրոշը նրան է հանձնել հայ երկրպագուն՝ Տիգրան Ալթունյանը: Երգչուհին մի փոքր զարմացել է, բայց ամեն դեպքում վերցրել է այն:

Ալթունյանը, որը բնակվում է Լոս Անջելեսում, սովորում ապահովագրական ընկերությունում ու աշխատում արագ սննդի կետում, BRAVO.am-ին պատմել է, թե ինչու է որոշել երգչուհուն Հայաստանի դրոշը նվիրել:

«Տոմսը համերգից 4 ամիս առաջ էի գնել: Համացանցում հետևում էի Ադելի ելույթներին և նկատել էի, որ մարդիկ նրան նվերներ են տալիս, որոնք սիրով ընդունում է: Երկար մտածելուց հետո որոշեցի ինձ հետ դրոշ տանել ու հանձնել նրան՝ մեր երկրի մասին բարձրաձայնելու համար: Երբ մոտեցավ ինձ, դրոշը տվեցի ու ասացի, որ իրեն շատ եմ սիրում: Գիտեի, որ աշխարհով մեկ նրա համերգներին շատ մարդիկ են հետևում և մեր դրոշին էլ ուշադրություն կդարձնեն: Հատուկ էի այնպես ընտրել, որ ծիրանագույնն արտահայտված լինի, ու չշփոթեն Կոլումբիայի դրոշի հետ»,- պատմել է նա:

Ալթունյանը հույս է հայտնել, որ մի օր Ադելը նաև Հայաստանում համերգ կտա ու հայաստանյան երկրպագուները նրա կենդանի կատարումները վայելելու առիթ կունենան:

Տեսանյութն՝ այստեղ։