Հորդանանը չեղարկել է Բայդենի հետ քառակողմ գագաթնաժողովը

Հորդանանը չեղարկել է Գազայի հատվածի իրավիճակի շուրջ քառակողմ գագաթնաժողովը, որը պետք է անցկացվեր չորեքշաբթի Հորդանանի մայրաքաղաք Ամմանում, հայտարարել է թագավորության արտաքին գործերի նախարար Այման աս-Սաֆադին։

Ավելի վաղ երեքշաբթի օրը Հորդանանի թագավոր Աբդալլահ Երկրորդի գրասենյակը հայտնել էր, որ չորեքշաբթի Ամմանում կկայանա քառակողմ գագաթնաժողով, որին կմասնակցեն Հորդանանի, Եգիպտոսի, ԱՄՆ-ի և Պաղեստինի առաջնորդները: Գագաթնաժողովում նախատեսվում էր քննարկել Գազայում տեղի ունեցող իրադարձությունները, դրանց տարածաշրջանային հետեւանքները և անկլավին օգնություն ցուցաբերելու հարցը, հայտնում է ՌԻԱ Նովոստին։

«Հորդանանը որոշել է չանցկացնել քառակողմ գագաթնաժողովը, որը նախատեսված էր չորեքշաբթի Ամմանում», - ասել է Աս-Սաֆադին հորդանանյան «Ալ-Մամլակա» հեռուստաալիքին:

Ավելի ուշ Սպիտակ տան մամուլի գրասենյակը հայտնել է, որ ԱՄՆ նախագահ Ջո Բայդենը չի թռչելու Հորդանան: Ամերիկյան վարչակազմի ներկայացուցչի խոսքով, Բայդենը, չնայած Ամման իր այցի չեղարկմանը, ակնկալում է արագ հանդիպում ունենալ Հորդանանի, Եգիպտոսի և Պաղեստինի ազգային վարչակազմի (PNA) առաջնորդների հետ և կապի մեջ կմնա նրանց հետ առաջիկա օրերին։

Երկուշաբթի երեկոյան Գազայի առողջապահության նախարարության ներկայացուցիչը հայտնել է, որ Գազայի հատվածում գտնվող Ալ-Ահլի բապտիստական ​​հիվանդանոցի վրա հարձակումն իրականացրել է Իսրայելը, որի հետևանքով զոհվել է ավելի քան 500 մարդ։ Պաղեստինի նախագահ Մահմուդ Աբասը եռօրյա սուգ է հայտարարել զոհերի համար։ Պաղեստինի առողջապահության նախարարության տվյալներով՝ զոհվածների մեծ մասը կանայք ու երեխաներ են։ Միաժամանակ, իսրայելական i24 հեռուստաալիքը հայտնել է, որ իսրայելական բանակի նախնական հետաքննությունը ցույց է տվել, որ Գազայի հատվածի հիվանդանոցներից մեկում պայթյունը տեղի է ունեցել ՀԱՄԱՍ-ի հրթիռի անհաջող արձակման հետևանքով։ Ավելի ուշ իսրայելական բանակը ողբերգության մեջ մեղադրել է «Իսլամական ջիհադ» խմբավորմանը: