«Հրապարակ». Ովքեր տուն եւ գրանցում ունեն, 40+10 հազար դրամը չեն ստանա

Կառավարությունը երեկվա նիստում վերջապես հաստատեց մի ծրագիր, որի մասին խոսում են արցախցիների տեղահանման առաջին իսկ օրվանից՝ ամսական 40 000+10 000 դրամ՝ ԼՂ-ից բռնի տեղահանված յուրաքանչյուր անձի համար։ Գումարները տրամադրվելու են յուրաքանչյուր շնչին` բանկային քարտի կամ «Հայփոստի» միջոցով, եթե շահառուն 75-ից բարձր է կամ 1-ին կամ 2-րդ խմբի հաշմանդամություն ունի եւ չունի բանկային հաշվեհամար։ 

Երեխաների փողը «նստելու» է ծնողների բանկային քարտերի վրա։ «Եթե հաշվարկում ենք, որ չորս հոգանոց ընտանիքը կստանա 200 հազար դրամ, իսկ մարզերում, օրինակ, մեզ մոտ վարձով տները 40-80 հազար դրամ են, ապա այդ գումարը միանգամայն բավարար է տան վարձը վճարելու եւ ապրելու համար։ Չհաշված, որ մենք դեռ ամեն մի ընտանիքի հատկացնում ենք օրական սննդային փաթեթները։ Իհարկե, Երեւանում տուն վարձելու համար դա բավարար չէ։ Բայց մարզերում բնակվելու համար ընտիր է»,- ասում է իշխանական աղբյուրը՝ Վարդենիս խոշորացված համայնքից։ Ըստ նրա՝ այնուամենայնիվ, մարդիկ են եղել, որ թողել են մարզը, գնացել Երեւան, իրենց փորձով համոզվել, որ այնտեղ ապրել հնարավոր չէ, ու մեկ օր անց գիշերով նորից հետ եկել։ 

Գումարները՝ 40+10 հազար, կտրվեն 6 ամիս։ Ենթադրվում է, որ դրանից հետո տեղահանվածներն այլեւս ինտեգրված կլինեն հանրապետության կյանքին, կունենան աշխատավարձ, այլ կերպ ասած՝ կդառնան սովորական հայաստանցիներ։ Սակայն մինչ այդ փախստականները երկար ճանապարհ ունեն անցնելու։ Կառավարության այս որոշումը նրանց համար յուրօրինակ իրավական գետտոյում է տեղավորում։ Որոշման մեջ գրված է, թե ովքեր չեն կարող ստանալ պետության գումարը՝ ՀՀ-ից բացակայողները, բնակչության պետական ռեգիստրում հաշվառված անձինք, պետության կողմից անվճար տրամադրված պետական տարածքում բնակվողները, նրանք, ովքեր բնակելի տարածք ունեն Հայաստանում։ Այս վերջինները կստանան միայն կոմունալի փոխհատուցումը, այսինքն՝ 10 հազարները։ 

Երկրորդ կետը՝ ՀՀ-ում հաշվառված չլինելու վերաբերյալ, խնդրահարույց է։ Ստացվում է, որ պետության աջակցությունը կարող են ստանալ միայն գրանցում չունեցողները։ Սոցապնախարարության խոսնակը պարզաբանում է. «Բոլորը, ովքեր օգտվում են աջակցության այս ծրագրից, ունեն Լեռնային Ղարաբաղում գրանցում, հաշվառում, իսկ Հայաստանի Հանրապետության կողմից նրանք անցնում են նույնականացում՝ միգրացիոն ծառայությունում։ Այսինքն՝ նրանք պետք է նույնականացված լինեն միգրացիոն ծառայության կողմից, սակայն հաշվառված չլինեն Հայաստանի Հանրապետությունում»։ 

Ո՞նց կարող է մարդն ապրել մի տեղ ու չհաշվառվել։ Աշխատանքի տեղավորվելու համար մարդը գոնե պետք է գրանցված լինի, երեխան պետք է մի տեղ հաշվառված լինի, եթե ուզում է դպրոց գնալ, ի վերջո՝ ընտրության մասնակցելու համար նույնպես գրանցում է պետք։ «Ձեր նշած դեպքերում, երբ անհրաժեշտ կլիներ հաշվառում, ԼՂՀ-ից տեղահանված անձանց համար պարտադիր հաշվառման պահանջ չի դիտարկվում»,- պատասխանեց խոսնակը։ Օգնությունը տրամադրվելու է նոյեմբերից՝ մեկանգամյա դիմումի հիման վրա։