ԿԽՄԿ-ին դեռևս չի հաջողվել տեսակցել Բաքվում գերության մեջ պահվող Արցախի ռազմաքաղաքական 8 գործիչներին․ «Փաստինֆո»

ԿԽՄԿ-ին դեռևես հնարավորություն չի տրվել տեսակցելու ադրբեջանցիների կողմից առևանգված և այժմ Բաքվում պահվող Արցախի Հանրապետության ռազմական և քաղաքական գործիչներին։

Ինչպես արդեն տեղեկացրել ենք՝ սեպտեմբերի 27-ին Արցախից ՀՀ տեղափոխվելու ընթացքում ադրբեջանցիների կողմից Լաչինի միջանցքում տեղակայված ապօրինի անցակետից առեւանգվել են Արցախի նախկին պետնախարար Ռուբեն Վարդանյանը և Արցախի Պաշտպանության բանակի նախկին հրամանատարի առաջին տեղակալ, գեներալ-մայոր Դավիթ Մանուկյանը, այնուհետև՝ գեներալ լեյտենանտ Լևոն Մնացականյանը։ Ավելի ուշ հայտնի դարձավ, որ գերեվարվել են նաեւ Արցախի Հանրապետության նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, նախկին արտգործնախարար Դավիթ Բաբայանը, Արցախի ԱԺ նախագահ Դավիթ Իշխանյանը, որոնց դեմ Բաքվում շինծու քրեական հետապնդումներ են հարուցվել։

ԿԽՄԿ ներկայացուցիչներին դեռևս չի հաջողվել տեսակցել նրանց, չի բացառվում, որ Ադրբեջանը թույլ չի տալիս մարդասիրական միջազգային անկախ, չեզոք կառույցի ներկայացուցիչներին հանդիպելու Բաքվում գերության մեջ պահվող պաշտոնյաներին՝ փորձելով թերեւս նրանցից թաքցնել Բաքվում անօրինական պահվող անձանց իրական թիվն ու նրանց նկատմամբ կիրառված բռնության հետքերը
ԿԽՄԿ-ից «Փաստինֆո»-ի հետ զրույցում հայտնեցին, որ տեղեկություններ չեն հաղորդվում։

«Փաստինֆո»-ն ավելի վաղ հայտնել է, որ ադրբեջանցիներն ավելի քան 9 ամիս շրջափակման մեջ գտնվող Արցախի նկատմամբ սեպտեմբերի 19-ին սանձազերծեց ռազմական ագրեսիա՝ թիրախավորելով խաղաղ բնակիչներին, որոնց տարհանելու հնարավորություն ուղղակի չկար։ Մեկ օր կատաղի դիմադրություն ցույց տալուց հետո՝ Արցախի իշխանությունները պարտադրված ընդունեցին կրակը դադարեցնելու ադրբեջանական պայմանը, այն է՝ լուծարել ՊԲ-ն ու սկսել ինտեգրացիա։ Ավելին, Բաքուն ներկայացրել էր նաեւ ցուցակ՝ Արցախի Հանրապետության կայացման գործում դերակատարում ունեցող անձանցից բաղկացած՝ պահանջել էր նրանց հանձնել, ըստ էության՝ դա սահմանելով խաղաղ բնակչության փրկագինը։

Հաշված օրերի ընթացքում Արցախը հայաթափվեց ու ավելի քան 100.000 հայ գաղթեց Հայաստան։