Առողջարա՞ր է արդյոք կոկոսի յուղը. նոր հետազոտություն

Թեև շատերը կոկոսի յուղը համարում են առողջարար, նոր հետազոտությունն այլ բան է հուշում:

Լաբորատոր մկների վրա կատարված փորձը ցույց է տվել, որ այն կարող է նպաստել գիրության զարգացմանը: Հետազոտությամբ պարզվել է, որ կոկոսի յուղը խաթարել է մկների կողմից երկու կարևոր հորմոններ՝ լեպտին և ինսուլին օգտագործելու կարողությունը, ընդ որում, ինսուլինի դիմադրողականությունը 2-րդ տիպի շաքարախտի հիմնական հատկանիշն է:

Դիետոլոգները խորհուրդ են տալիս ընտրել չհագեցած կամ պոլիչհագեցած յուղեր՝ կոկոսի յուղի նման հագեցած յուղերի փոխարեն:

Համաձայն նոր հետազոտության՝ ութ շաբաթվա ընթացքում մկների սննդակարգում ավելացված կոկոսի յուղի ցածր չափաբաժինները հանգեցրել են նրանց նյութափոխանակության փոփոխությունների, ինչը նպաստել է գիրության և դրա հետ կապված համակցված հիվանդությունների զարգացմանը:

Կոկոսի յուղը խանգարել է մկներին՝ ճիշտ օգտագործել լեպտինը և ինսուլինը, հորմոններ, որոնք կարևոր են էներգիայի ծախսը, քաղցը կարգավորելու համար:

Փորձերը հաստատում են այն վարկածը, որ հագեցած ճարպաթթուներով հարուստ սննդակարգը կարող է հանգեցնել լեպտինի դիմադրության: Լեպտինի դիմադրության զարգացմանը զուգահեռ, մարմնի ճարպային հյուսվածքը, որը հայտնի է որպես սպիտակ ճարպային հյուսվածք, նույնպես ավելի քիչ է արձագանքում լեպտինին:

Բացի այդ, կոկոսի յուղը մկների մոտ առաջացրել է կենտրոնական և ծայրամասային բորբոքային պատասխան, քաշի ավելացում, ճարպի ավելի բարձր տոկոս, էներգիայի կրճատում և անհանգիստ վարքագիծ՝ համակարգային անհավասարակշռություն:

Հետազոտողները պարզել են նաև, որ կոկոսի յուղը սթրես է առաջացնում էնդոպլազմիկ ցանցում, փոխանցում է Aysor.am-ը։