Արդարադատության նախարարությունն աջակցում է դատավորների կարողությունների զարգացմանը

Արդարադատության նախարարի տեղակալ Կարեն Կարապետյանն ընդունել է Շվեդիայի ազգային դատարանների ադմինիստրացիայի միջազգային գործերի բաժնի ղեկավարի պաշտոնակատար Լյուդվիգ Բեքինգի գլխավորած պատվիրակությանը:

Հանդիպման ընթացքում քննարկվել են «Հայաստանի դատավորների կարողությունների զարգացում՝ դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով երկկողմանի համագործակցության» ծրագրի առաջին փուլի ընթացքում կատարված աշխատանքները:

Անդրադարձ է կատարվել ծրագրի հիմնական ուղղություններին՝ դատավորների շրջանում էթիկայի, կոռուպցիայի դեմ պայքարի և բարեվարքության վերաբերյալ իրազեկվածության բարձրացմանը, կողմերի և լրատվամիջոցների հետ դատավորների հաղորդակցության կարողությունների զարգացմանը:

Շվեդիայի ազգային դատարանների ադմինիստրացիայի ներկայացուցիչները խոսել են ծրագրի ընդհանուր նպատակների և արդյունավետության, դատական համակարգի նկատմամբ հասարակության վստահության բարձրացման մեխանիզմների մասին:

Արդարադատության նախարարությունն իր պատրաստակամությունն է հայտնել աջակցել ծրագրի հաջորդ փուլի իրականացմանը։

Հանդիպման ավարտին կողմերը շնորհակալություն են հայտնել միմյանց արդյունավետ քննարկման համար և ձեռք բերել պայմանավորվածություն՝ հետագա հանդիպումների և շարունակական համագործակցության համար: