ԼՂ հարցից անցանք ՀՀ տարածքային ամբողջականության հարցին ու դուք սա հաջողությո՞ւն եք անվանում, ե՞րբ է առհասարակ «անկլավների» հարց քննարկվել․ Վարդան Օսկանյան

Նիկոլ Փաշինյանի սխալների շքերթը շարունակվում է, նա սխալվեց մինչև 2020թ-ի պատերազմը, նա սխալվեց նաև պատերազմից հետո, երբ մի կողմ դրեց նոյեմբերի 9-ի պայմանագիրը՝ խախտելով դրա կոնտեքստը։

Այս մասին ֆեյսբուքյան ուղիղ եթերի ժամանակ ասաց ՀՀ նախկին արտգործնախարար Վարդան Օսկանյանը։

Վերջինիս խոսքով՝ Նիկոլ Փաշինյանի սխալների վերջին օրինակը Գրանադայի հայտարարությունն է, որտեղ խոսք էր գնում ոչ թե ԼՂ-ի, այլ ՀՀ տարածքային ամբողջականության մասին։

«Իսկապե՞ս, մենք Ղարաբաղի հարցից անցանք Հայաստանի տարածքային ամբողջականության պաշտպանությա՞նը ու հերոսաբար ներկայացնում ենք, որ հաջողությա՞ն ենք հասել, որ աշխարհը ճանաչո՞ւմ է մեր տարածքային ամբողջականությունը։ Փաշինյանի հասկացած տարածքային ամբողջականությունը անգամ մեզ համար է անորոշ։

Քառակուսի կիլոմետերերով այնտեղ նշված թվերը մեր ժողովրդի համար ոչինչ չեն նշանակում։ Առնվազն այսօր Փաշինյանը պետք է կանգնի ժողովրդի առաջ ու ասի, թե ինչ է մտնում այդ թվերի մեջ։ Այսպես կոչված «անկլավները» այդ թվի մեջ մտնո՞ւմ են, թե ոչ, քո շրջապատի մարդիկ ասում են չկա, բայց դու քո ասուլիսներից մեկում ասել ես, որ այո, դա էլ ենք տալիս։ Դա՞ է քո հասկացած տարածքային ամբողջականությունը, որ ՀՀ քաղաքացին Պարսկաստան, Վրաստան գնալուց անցնի Ադրբեջանով։ Հենց հիմա կանգնիր ու ասա՝ ինչ ես բանակցում, եթե այդ «անկլավները» իսկապես մտնում են, դու մի րոպե այդ պաշտոնում մնալու իրավունք չունես։ Ե՞րբ ենք առհասարակ մենք Հայաստանի տարածքային ամբողջականության խնդիր ունեցել, 30 տարվա մեջ դուք լսե՞լ եք «անկլավների» մասին»,- ասաց Օսկանյանը։

Նա հիշեցրեց, որ նախորդ 30 տարիների բանակցային գործընթացի ոչ մի փուլում երբէ «անկլավների» ու ՀՀ տարածքային անբողջականության հարց չի առաջացել։

Նախկին արտգործանախարարը դիմեց նաև ընդդիմությանը։

«Ընդդիմության այն հատվածը, որ անընդհատ ասում է, թե Փաշինյանին բերել են դրսի ուժերը, որ Արցախը հանձնի Ադրբեջանին, սրանով դուք արժևորում եք Փաշինյանին, դրանով նաև անզոր եք դարձնում մեր ժողովրդին։ Ժողովուրդը մտածում է՝ եթե դրսի ուժերն են բերել, մենք ինչ կարող ենք անել։ Փաշինյանին ժողովուրդն է բերել և ժողովուրդը կարող է ուղարկել։

Այդ օրերին առաջին ճակատում Փաշինանն էր հայտնվել և նրան էլ բերեցին։ Մի՛ վերցրեք ժողովրդի ձեռքից նրան հեռացնելու ուժը։ Այս ամեն ինչը Փաշինյանի թուլության, տգիտության ու բոբիկության արդյունքն է, ուրիշ բան չկա։ Հայաստանի ղեկավար լինելը Փաշինյանի «հագով» չէ։ Եթե այսօր Հայաստանի ղեկավարը նորմալ մարդ լիներ, Գրանադայում ձեռքը կխփեր սեղանին ու կասեր՝ ամեն ինչ կանգնեցնում եմ, մինչև մեր առևանգնված քաղաքացիներին բաց չթողնի Ադրբեջանը։ Նիկոլ Փաշինյանի առաջ պետք է լուրջ հարց դրվի՝ կամ դու բերում ես մարդկանց և ստեղծում ես մարմին, որը այս ճակատագրական պահին վերցնում է հավաքական պատասխանատվություն, կամ թողնում գնում ես, այլընտրանք չունես, հերի՛ք է»,- ֆեյսբուքյան ուղիղ եթերի ժամանակ ասաց նախկին արտգործնախարար Վարդան Օսկանյանը։