Բռնի տեղահանվածների մոտ 75%-ն ունի բանկային քարտ․ ԿԲ նախագահի տեղակալը ներկայացնում է՝ ինչպե՞ս են 100000 դրամը ստանալու

Արցախից բռնի տեղահանված չափահաս քաղաքացիների մոտ 75 տոկոսն ունի բանկային քարտեր։ Այս մասին մամուլի ասուլիսի ընթացքում ասաց Կենտրոնական բանկի նախագահի տեղակալ Հովհաննես Խաչատրյանը։

«Արցախցիների 75%-ը այս պահին ունի քարտեր, որոնց կփոխանցվեն գումարները։ Մենք աշխատելու ենք այնպես, որպեսզի, մասնավորապես, վերջին 15 ամիսների ընթացքում ակտիվ քարտային գործունեություն իրականացրած քարտերին փոխանցվի։ Քաղաքացիները կարող են մոտենալ բանկոմատին՝ կանխիկացնելու համար, խանութներում վճարումներ կատարելու համար, սակագները կարող են տարբեր լինել, բայց մեր առեւտրային բանկերը վերհանելու են այն բոլոր քաղաքացիներին, որոնք Արցախից բռնի տեղահանված մեր քաղաքացիներն են։ Եթե պարզվի, որ հաճախորդի մոտ կա գործող քարտ, բայց իրականում այդ քարտը օրինակ՝ կորցված է, ապա այդտեղ ոչ մի խնդիր չկա, այդ քաղաքացին կարող է բանկ մոտենալով ինչպես բանկի սպասարկման սրահից կանխիկով վերցնել իրեն հասանելիք գումարը կամ դիմում գրել եւ վերաթողարկել քարտը»,- նշեց նա։

Նա նշեց, որ քարտեր չունեցողների համար բոլոր բանկերը կիրականացնեն անվճար սպասարկում, անհրաժեշտ է անձը հաստատող փաստաթուղթ եւ հանրային ծառայության համարանիշ։

Հովհաննես Խաչատրյանն ընդգծեց, որ փաստաթուղթ ունեցող քաղաքացու դեպքում, որը անձնագրով բանկ է ներկայանում, պարտադիր փաստաթղթերի մեջ մտնում են ոչ միայն անձնագիրը, այլեւ սոցիալական ծառայության հաշվեհամարը, բնակության վայրի հետ կապված տեղեկատվությունը․

«Բայց առեւտրային բանկերը իրենց ներքին որոշումներով չեն պահանջելու լրացուցիչ փաստաթղթեր՝ բնակության վայրը նշելու համար։ Այսինքն՝ հաշիվը բացելու համար դա խոչընդոտ չի հանդիսանա։ Լիազոր մարմնի կողմից տրված ինչպիսին որ լինի այդ փաստաթուղթը, եթե լուսանկարով ու պարտադիր վավերապայմանով անձը հաստատող փաստաթուղթ լինի, բնականաբար, այդտեղ պետք է լինի հանրային ծառայության հաշվեհամարը նշված, որովհետեւ այդ պարագայում ինդենտիֆիկացնելն այլապես դժվար կլինի։ Բանկերը հիմք կընդունեն՝ քարտեր բացելու համար»։

Վարչապետի մամուլի քարտուղար Նազելի Բաղդասարյանը նշեց, որ հաշվառման գործընթացում պարզ է դարձել, որ կան որոշակի թվով անձինք, որոնք չունեն փաստաթղթեր, այսինքն՝ նույնականացման գործընթացն ավելի բարդ է իրականացնել․ «Այս պարագայում պետք է Միասնական սոցիալական ծառայություն դիմել, որպեսզի ունենալ նույնականացում, քանի որ բանկային հաշիվ բացելու համար պետք է վավերական փաստաթուղթ, եւ այդ գործընթացը պարտադիր է անցնելու»։

Նա նաեւ շեշտեց, որ անչափահաս արցախցիներին գումարը կփոխանցվի նրանց մայրերի հաշվեհամարներին․ «Մայրիկի ունեցած հաշվեհամարով իրենք ստանում են այդ գումարը։ Դուք կարող եք մուտք գործել Աշխատանքի եւ սոցիալական հարցերի նախարարություն, եւ համապատասխան հարթակում լրացնելու այդ տվյալները, որից հետո այդ գումարը ինքնին կփոխանցվի մայրիկի հաշվեհամարին»։